Europa ta clave pa diversificacion

Aruba Tourism Authority ta intensifica esfuerzo den 2024

ORANJESTAD (AAN): Recientemente a tuma luga un reunion entre A.T.A. su C.E.O., Ronella Croes, C.M.O. Sanju Luidens, Communication Manager, Marisol Sanchez, Director di Mercado di Europa, Tirso Tromp, Jaap Ellis, Sales and Marketing Manager pa Europa y ekipo di A.T.A. Europa, representantenan di tur mercado y potencial representantenan nobo pa mercadonan di habla Aleman cu ta inclui e mercado di Suiza cual ta desea di crece. 

            Durante di e biahe a sostene reunionnan cu agencia di publicidad pa Aruba na Inglaterra pa asina revisa resultadonan di 2023 y acorda ultimo detaye pa cu e mercado Ingles pa 2024. Tambe a reuni cu representante di Aruba pa e mercado aki, unda a elabora riba e esfuersonan adicional pa 2024, como tambe e empuhe adicional den e mercado pa medio di e.o. British Airways. 

            A.T.A. ta sigui enfoca riba diversificacion pa medio di e mercado Europeo. Retonan tin diferente, y pesey mes ta intensifica esfuerzo di diferente manera. Ta sigui pusha pa expande e mercado di inglaterra, habla Aleman, Italiano, Suecia, Belgica y claro Hulanda.

            Pa cu e mercadonan habla Aleman, A.T.A. ta evaluando strategia pa e mercado aki y a habri e proceso pa un posibel cambio den representacion. E decision aki ta basa riba reunionnan sosteni unda cu cuater diferente compania/ agencia Aleman cu a duna un presentacion amplio di e strategia cu lo desplega pa yega na metanan stipula. Tur esaki basa riba un “Request For Approval” cu A.T.A. a suministra unda ta delinea e direccion desea.

            E mercado di Europa ta representa historicamente rondo di 8% di total di bishitante cu ta bishita. Pa 2024 tin un meta fiha di 13% di crecemento, di cual e mercadonan habla Aleman lo mester produsi un crecemento di 35% versus 2023. E mercadonan habla Aleman ta keda rondo di 11 anochi y pues esaki entre otro ta haci e mercadonan aki atractivo. Pa 2023 ta proyecta cu Europa lo sera e anja cu un crecemento di 5% riba 2022.

            E estadia averahe mas largo di esnan di Europa ta produsi mas entradapa pais Aruba y pues ta sigui haci di Europa un propuesta atractivo.