Presidente di Comite Olimpico Internacional ta yega Aruba awe

ORANJESTAD (AAN):  E siman aki, e comunidad deportivo di Aruba ta ansioso pa ricibi e mandatario mas halto di deporte na Mundo, esta sr. Thomas Bach, presidente di Comite Olimpico Internacional.

Hunto cu sr. Bach lo bini tambe un delegacion di ehecutivonan di Panam Sports y Olympic Solidarity.

Pero ken realmente ta Thomas Bach?

Thomas Bach ta naci 29 December 1953 na Alemania y ta di profesion abogado como tambe un ex-miembro di e ekipo Olimpico di esgrima y medayista di Oro Olimpico den e Weganan Olimpico di Montreal.

Thomas Bach ta den su 9 aña como presidente di Comite Olimpico Internacional (International Olympic Committee) esaki desde 10 di september di aña 2013. Bach tabata tambe un miembro di comite di ehecutivo di e Confederacion Olimpico Aleman. Bach ta tambe e prome campeon Olimpico cu a keda eligi como presidente di Comite Olimpico Internacional.

            El a keda eligi pa un termino di 8 aña como IOC President na e 125th IOC Session na Buenos Aires, Argentina na september 10 di anja 2013. Cu 49 voto den e ronda final, e la sigura e votonan mayoritario y a keda eligi. 

            Bach a reemplasa Jacques Rogge cu a sirbi como presidente di IOC for di 2001 to 2013. El a wordo re-eligi pa su di dos termino como presidente na e 134th IOC Session esaki na 2019 y lo keda te cu 2025. Durante su presidencia te cu awor, Thomas Bach a wordo reconoci cu diferente honor pa su excelente trabou desplega den deporte esaki rond mundo, por ehempel na Polonia, Grecia, Tunisia, Spaña, Korea del Sur y Hapon.

            Actualmente, hunto cu un delegacion di miembronan di e comite di ehecutivonan di Panam Sports y Olympic Solidarity, e ta den un gira den Centroamerica y Caribe unda nan ta bishitando varios pais, incluyendo Aruba e weekend benidero.

            Presidente Bach ta bishitando e paisnan/islanan den Caribe caminda tin miembronan di Comite Olimpico Internacional. E ta bishita nan y e NOCs di e paisnan.