ORANJESTAD (AAN): SKOA a cuminsa cu aplicacion general di muchanan pa e proximo aña escolar pa tur nivel di scol.
E ta importante pa tur mayor ta bon informa cu pa e aña escolar nobo di 2023-2024 tin cambionan den e suma di contribucion di “schoolgeld y airco geld” pa e scolnan di SKOA. Tarifa di contribucion di mayor pa e aña escolar binidero ta lo siguiente pa cada nivel di scol:
Pa kleuterschool schoolgeld ta 250 Florin y aircogeld ta 150 Florin.
Pa basisschool schoolgeld ta 275 Florin y aircogeld ta 150 Florin.
Pa mavoschool schoolgeld ta 350 Florin y aircogeld ta 150 Florin.
Pa por aplica pa aña escolar 2023-2024 mester cumpli cu rekisito di SKOA cu ta rekeri e contribucion di “schoolgeld y airco geld” ta completamente paga di aña escolar anterior di 2022-2023. Mayornan por haci peticion pa un areglo di pago entrante 1 di April 2023.
Mayornan cu no (re)inscribi nan yiunan na tempo of cu no ta cumpli cu e rekisitonan di SKOA por tin consecuencia caminda e aplicacion por worde cancela. Esaki por resulta cu e mucha no ta bay tin su luga sigura na un scol pa e proximo aña escolar. Pa preveni esaki SKOA ta conseha pa mayornan haci aplicacion na tempo pa asina sigura nan luga na un scol y cumpli cu su derecho na enseñansa.
