President Gerlien Croes di Parlamento a bay ricibi manifiesto  

Marcha pa exigi husticia pa Ayden Lanoy

ORANJESTAD (AAN): Despues cu 27 di Februari y 4 di Maart cu a pasa, Parlamento a reuni riba e topico di tiramento na Madiki Kavel cu a finaliza cu pueblo di Aruba a bira masalmente desapunta y disgusta con secreto y scondi tur e investigacion ta andando, y cu ainda ningun detencion a cay... tanto famia, cu amigo- y ciudadanonan di Aruba a subi caya pa manifesta nan disgusto con Cuerpo Policial y Ministerio Publico ta atende e asunto aki.

   Entre esnan den e grupo di manifestante, ta e mama y tata di e hoben Ayden Lanoy di 19 aña cu a perde su bida den e incidente tragico aki como 1 luna pasa, esta Diadomingo 9 di Februari 2025.

   Ministerio Publico a defende su mes bisando cu ta wardando resultadonan bin di e Instituto Forensico na Hulanda.

   Pa un motibo hopi raro, escolta Policial no a presenta na tempo, y basta laat.  Finalmente e manifestacion a cuminza for di dilanti Palacio di Husticia den Emanstraat, rumbo pa Parlamento di Aruba.

   Hopi hende cu pancarta den man, demostrando cu e asunto aki keto bay ta wordo vigila di cerca door di Polis.

   Na Parlamento, president actual mr. Gerlien Croes a baha, acompaña pa Stefany Sevinger (AVP) y tambe Wendrick Cicilia (AVP).

   Den nomber di Parlamento di Aruba, mr. Gerlien Croes a ricibi un manifesto entrega y sosteni door di famia, conoci y cuidadanonan na Aruba pa cu e caso di Ayden Lanoy.  Croes a indica cu e ta spera cu transparencia y consuelo prevalece den e situacion doloroso aki.

   Publico a gradici tur pa e sentimento humano den e caso tristo aki, aunke a puntra nan mes di con otro fraccionnan den Parlamento no a baha y topa e manifestantenan.

   Ban spera cu por yega na e cierre di e crimen asina cruel cu a laga famia Lanoy sin nan yiu stima Ayden Lanoy.