Discurso bunita durante Conferencia di Hende Muhe
ORANJESTAD (AAN): Gobierno di Aruba, riba Dia Internacional di Hende Muhe, a organiza pa di 8 aña consecutivo un conferencia dedica na tur e sernan femenino, di cual 7 tabata den un sala completamente yen y 1 tabata virtual debi na e pandemia.
E conferencia aki “Hende Muhe y Mucha Muhe Empodera ta Empodera henter Mundo” a conta cu un sala completamente yen, na unda tur esnan presente por a disfruta di varios presentacion inspirativo, enfocando riba e importancia di empodera nos hende muhe y mucha muhenan. E conferencia a inicia cu e bunita cancion Gospel “Bo ta Santo” canta pa Eltienne Yarzagaray sigui pa un discurso di Aruba su Prome Minister Evelyn Wever-Croes.
Durante su discurso Prome Minister a elabora riba lidersago femenino y e importancia pa prepara nos mucha muhenan pa por asumi posicionnan di lidersago den futuro. El a conta con su persona a worde acerca pa The New York Times na 2018, cu a indica despues di un estudio, cu e exito di pais Aruba ta danki na e lidersago femenino. Prome Minister a indica cu liderasgo femenino ta necesario no solamente pa Aruba sino pa henter mundo, paso ta asina so e prioridadnan, y necesidadnan di e ser femenino por worde tuma na cuenta.
Tambe Prome Minister a comparti cu esnan presente e 4 areanan cu ta traha pa su persona, y con e ta crea un balans den su bida;
Area 1: Famia/Amistadnan: El a splica cu e prome area ta su famia y amistadnan, y aki ta unda e tin cu percura cu e area aki ta stabiel. E ta importante pa crea un netwerk cu famia of amigonan pa asina entre nan comparti e peso y brinda ayudo na otro ora tin mester.
Area 2: Crea un structura na trabao: Trabao ta importante pero nos cada un tin cu realisa cu nos no por haci semper tur cos nos so. Ta importante pa semper tin un persona mas na ken e trabao por worde delega, paso nos niun tey pa semper y tur hende mester un “break”.
Area 3: Spritualidad y Fe: Prome Minister a splica cu e area aki ta esun cu ta trece hopi trankilidad pa su persona, specialmente den momentonan menos bon. Y cu tin momento cu cosnan ta hopi dificil pero cu nada ta pa semper y alfinal e solo ta sali. Su fe ta loke ta yud’e pa enfrenta cualkier obstaculo.
Area 4: Servicio na comunidad: E ta sumamente importante pa duna back na comunidad, paso esaki ta trece un sentimento di satisfaccion. Yudando otro den necesidad, bo ta yudando bo mes como persona den varios sentido.
“Mi kier a finalisa mi discurso cu un quote; “Dimming someone else’s light, won’t make yours shine brighter” P’esey no ban purba paga e luz di niun hende, sino ban sigui briya nos luz, pa asina nos por logra hopi mas.
Mi kier gradici boso pa acepta nos invitacion na e conferencia aki, y felicita cada un di boso riba boso dia. Durante e ultimo 7 añanan mi a sirbi boso cu hopi orguyo, y mi ta spera cu den bosonan wowo mi a haci un bon trabao. Mi a haci tur loke tabata den mi poder pa demostra cu hende muhe por lidera un pais, y esaki tabata posibel danki na boso sosten. Un cos mi por bisa; Mi ta e prome Minister President di Aruba, pero mi ta sigura boso, cu mi no lo ta e ultimo!” Prome Minister a expresa.
{gallery}Mi ta e prome Minister President femenino di Aruba, pero mi ta sigura boso, cu mi no lo ta e ultimo{/gallery}
