Presentacion ‘Intercambio Cultural entre Generacionnan’ tabata fabuloso den Centro Caiquetio

ORANJESTAD (AAN) Den Centro Caiquetio na Paradera, a tuma lugar recien e bunita presentacion yama “Intercambio Cultural entre Generacionnan”, Edicion 2025.

   Na esaki, tanto adulto mayor, teeners y mucha a trece riba escenario nan expresionnan artistico y talento, yena cu creatividad, sea den obra di teatro, comedia, canto y baile. E grupo Happy Heart a presenta su obra “Fantasia di Sombre” hopi creativo y elegante.

   Cada grupo a destaca cu nan fantasia y originalidad. Un total di 12 grupo participante di e gruponan 60 plussers na Aruba, hopi anima y creativo a trece nan alegria dilanti, na un forma sublime. Minister di Adulto Mayor y directora di Ouderen Zaken tambe tabata presente.