Prensa tambe a felicita Aruba Bank cu nan donacion urgente pa yuda muchanan cu desayuno

ORANJESTAD (AAN): Siman pasa durante un brindis special cu gerencia di Aruba Bank a ofrece na prensa di Aruba,

riba e Montforte III Luxury Cruise cerca di costa pabao di e isla, tabatin un momento cu DIARIO a transmiti e mensahe di gratitud na e ehecutivonan presente.

   DIARIO a indica na gerencia, cu nan gesto noble pa mesora tuma decision, rek man, y duna yudanza na Fundacion Ban Uni Man pa Cria Nos Muchanan, a wordo bon ricibi.

   Esnan di Aruba Bank a splica cu nan a lesa den corant di e problemanan cu Fundacion Ban Uni Man pa Cria nos Muchanan ta confrontando awor na luna di September pa prepara cuminda pa 800 mucha cu ta bay scol.  Pues cu como 300 mucha lo bay keda sin por haya nan desayuno di tur mainta.

   E ehecutivonan di Aruba Bank a mustra cu nan tambe a ricibi siman pasa hopi agradecimento pa nan decision di duna un contribucion inmediato di 20.000 Florin pa evita cu cortamento di desayuno socede.

   Nan a logra haya contacto mesora cu e respetable señor John Fun di Fundacion Ban Uni Man pa Cria Nos Muchanan, pa e ricibi e donacion aki.  Prensa pues tambe a felicita Aruba Bank cu e gesto bunita aki, cu ta uno hopi di aprecia.