Benny como Controlador di Gobierno mester enfrenta Husticia!
*Si Benny mester bolbe prison, e por keda Miembro di Parlamento??
*Si oposicion haya mayoria den Parlamento por cambia leynan
ORANJESTAD (AAN) — Na 1748, Montesquieu a habri porta pa loke e siman aki lo bay pasa na Aruba.
E Seperacion di Poder pa democracia por funciona, awe na Aruba ta entrega prueba, di tabata uno di e armanan mas importante pa Pueblo den realisacion di un Gobierno di Pueblo pa Pueblo, manera Democracia ta exigi.
Un Gobierno di Pueblo pa Pueblo, ta exigi cu e trabou di Politiconan como representantenan di Pueblo, no ta basa riba prosperidad y bienestar di e politico, pero riba bienestar di e Pueblo cu ta paga politiconan pa traha na interes nacional.
Montesquieu kier a deshaci di e posibilidad cu centralisacion di poder den un solo man, lo a duna e politico poder pa haci bofon di democracia.
Awe un caso den Corte di Aruba ta duna Montesquieu razon na momento cu Huez cuminsa cu e proceso final pa dicidi si Benny Sevinger ta culpabel of inocente di a abusa di su poder como Ministro di Aruba pa asina e bira Miyonario.
Si e acusacionnan di Ministerio Publico ta berdad, Benny Sevinger a trapa cu tur forsa riba e base legal di Aruba, pa e gana placa personalmente na forma bruto y criminal.
Pa Benny Sevinger por drernta sala di Husticia awe como acusado oficial, tabata tin un proceso legal cu a cuminsa cu buskeda di e prome pruebanan door di Ministerio Publico despues cu e acusacion basico contra Benny Sevinger a duna motibo pa haci esaki.
Landsrecherche, sin mira kende Benny Sevinger ta den comunidad, mester a haci su trabou y cuminsa cu un investigacion cu despues lo a wordo clasifica como Benny como haraña den un network increibel.
Huez Comisario a guia e prome parti di e proceso, cu mester a conduci na e momento cu awe Benny Sevinger hunto cu otro acusadonan mester presenta den Corte di Husticia, caminda Huez lo dicidi si tur cos ta na orden pa cuminsa cu e huicio.
Ta bon pa aclarea cu Huez no por start un proceso sin mas y cu Ministerio Publico ta encarga cu investigacionnan cu mester ta di acuerdo cu loke ley ta stipula. Na momento cu un of mas miembro di Ministerio Publico no haci nan trabou di acuerdo cu ley, nan tambe ta den problema si prueba palpabel subi riba mesa.
Awe Benny Sevinger mester presenta dilanti Huez pa corupcion, pa abuso di placa di Aruba y hasta pa ladronicia.
Lider di Partido di Benny Sevinger, Mike Eman, a hiba un lucha publico pa Benny por tabata den Parlamento di Aruba awe a pesar cu esaki a nifica cu ta durante su detencion preventivo, den prison, Benny a wordo eligi pa bira Miembro di Parlamento.
Cualkier empresa lo a manda nan empleado cas si e ta acusado di un Mega caso manera ta Caso Avestruz. Pero Mike Eman a logra cu Benny ta presenta dlanti Huez como Miembro di Parlamento, cu ta dicidi kico Leynan di Aruba ta contene pasobra ta Parlamento mester traha y aproba Ley.
Mike Eman a dicidi cu Benny Sevinger lo aparece den un caso cu acusacion cu placa a lora na forma criminal, mientras Benny Sevinger mester controla caha di Gobierno di Aruba y tin boz decisivo kico ta pasa cu placa di Aruba.
Benny Sevinger como Miembro di Parlamento, si bin cambio den Gobierno y su partido haya mayoria, por presenta y pasa un ley cu ta mishi cu Husticia.
Awe Benny Sevinger ta presenta den Corte y por bisa cu su futuro ta depende di e decision di Huez.
Na mes momento e futuro di mundo di Husticia di Aruba ta depende di Benny Sevinger tambe como Miembro di Parlamento y mas ainda si por baha gobierno, AVP forma un Gobierno, y e mayoria den Parlamento pasa un ley cu lo mishi cu cualkier parti di e forma cu Husticia ta wordo haci na Aruba actualmente.
E caso Avestruz lo tuma su tempo. Cambio di Gobierno, cu AVP ta persigui actualmente uzando e Guera di Ukraine, por resulta den un cambio di Gobierno si un solo miembro di MEP of RAIZ presta su mes pa esaki.
Imediatamente despues di cambio, e mayoria nobo por actua y pasa un ley cu por cambia e base di leynan cu caso Avestruz ta contene.
Mientrastanto si Benny mester bolbe prison, e por keda Miembro di Parlamento, pasobra ya el a huramenta ora su detencion preventivo a wordo suspendi?
DIARIO ta keda pendiente pa informa Pueblo di Aruba di tur suceso,
