Premio Nacional “Crioyo di Oro” tabata grandioso pa duna Maybelline Arends-Croes su homenahe

ORANJESTAD (AAN): Recientemente Cas di Cultura a bisti di gala y tabata completamente yena di alumno, ex-alumno, admiradornan, amigonan y famia di nos baluarte local Maybelline Arends-Croes.

Un homenahe excepcional a tuma lugar cu a worde brinda na un baluarte cultural tanten cu e ta na bida. Durante e anochi aki, Maybelline Arends-Croes a ricibi e premio nacional “Crioyo di Oro” como elogio, gratitud y reconocemento pa su aporte di bida largo na desaroyo cultural di Aruba.

   E forma cu henter e evento a worde presenta e anochi aki a duna tur esnan presente e sintimento cu nan tabata experenciando un berdadero “nochi di Hollywood”.  Un produccion di calidad haltisimo. E homenahe musical aki a conta cu un elenco impresionante di centenares cantante y musico cu durante un poco mas di 3 ora y mey largo a presenta un mahestuoso concierto dedica na Maybelline Arends-Croes.
   E forma cu e anochi a worde anima tabata formidabel y totalmente diferente di loke cu publico local ta custumbra cune. Actriz Faridi Dao a personifica e personahe “ChiMay” pa asina presenta e homenahe di un forma unico cu e publico presente a encanta.  Durante e evento aki, Maybelline mes a presenta algun di su temanan incluyendo e cancion inmortal cu el a crea hunto cu Hubert “Lio” Booi na aña 1972: “Llanto di un mama”.

   Fundacion Go Cultura representa pa cantante Edjean Semeleer a introduci e momento cu e premio “Crioyo di Oro” a worde treci riba escenario door di presidente di e fundacion, Arthur Loefstok, cu a pasa esaki den man di Ministro di Enseñanza y Deporte Sr. Endy Croes pa asina e ministro por a haci entrega di e “Crioyo di Oro” na Maybelline den nomber di Gobierno di Aruba, Ministerio di Cultura, Fundacion Go Cultura, Departamento di Cultura, Unoca y comunidad di Aruba.

   Maybelline a worde nombra como Aruba su di dos “Crioyo di Oro” como merito di excelencia artistico y a ricibi e galardon. Esaki despues cu na aña 2021, Jossy Brokke tabata e prome pa ricibi e premio prestigioso aki.

  “Premio Nacional Crioyo di Oro” ta un premio anual tipo “lifetime achievement award” produci y presenta pa Fundacion Go Cultura den aliansa cu Ministerio di Cultura, Gobierno di Aruba y Unoca, pa reconoce e trabao, dedicacion y esfuerzo di nos baluartenan local cu a duna nan aporte pa e desaroyo cultural di nos isla. Publico general ta haya e oportunidad mas di dos luna largo pa nomina esnan cu nan ta desea pa ricibi e premio aki na final di aña.
  Tur esnan cu tabata tey presente tabata di acuerdo cu e homenahe aki na Maybelline tabata uno cu el a merece pa su mas di 54 aña di aporte na formacion di miles di ciudadano y pa tur loke el a y ta haci y significa pa Aruba. Tur esnan presente tabata consciente cu nan a experencia un anochi historico y inolvidabel. Specialmente na momento cu a presenta e premio nacional cu e aña aki a bay pa Maybelline.

  Como parti di e proyecto aki tambe lo tin un documentario biografico di Maybelline Arends-Croes cu lo worde estrena den e prome mitad di aña 2023 y tambe estreno di e grabacion di e evento ariba pantaya di television dentro di poco.

  Fundacion Go Cultura por mira back riba otro evento sumamente exitoso, historico y inolvidabel.

Pabien na nos baluarte local Maybelline Arends-Croes cu su “Crioyo di Oro” bon mereci y pa su homenahe excepcional.

   E proyecto aki a worde haci posibel danki na e sosten sumamente valioso di Gobierno di Aruba, Ministerio di Cultura, Unoca, Departamento di Cultura, Prins Bernhard Cultuurfonds Caribisch Gebied, Setar, Aruba Airport Authority, Clickprint, Artopia, Amito, La Moderna y Sleep Comfort.
Nos felicitacion na tur cu a asisti Fundacion Go Cultura pa presenta y ehecuta un proyecto exitoso cu merece continuacion y apoyo di nos comunidad.