ORANJESTAD (AAN): Manera DIARIO a trece dilanti, recien Kiwanis Club of Palm Beach Aruba a instala su directiva nobo pa e aña 2022-2023. President nobo a bira Daniel Aguirre.
E President saliente, esta Rothmar Coenraad, den su discurso a refleha cu e enfoque di aña tabata e recuperacion for di e Pandemia di Covid-19. Den e cuadro aki Kiwanis Club of Palm Beach a logra di ehecuta no mas cu tres actividad pa recauda fondo. Na november 2021 tabata tin e segundo edicion di e “Kiwanis Ride for Kids” (un evento di ciclismo rond Aruba). E evento aki a recauda mas cu Afl 50.000 pa nos comunidad. For di esaki entre otro, e mesun dia, a haci un donacion na SKOA pa yudansa financiero pa 100 muchanan cu tin dificultad pa paga nan schoolgeld. E meta akinan tabata pa e alumno por atende e scol trankilo y sin dolor di cabes pa ambos e mucha y mayor durante un temporada dificil.
Ademas na mei 2022 tabata tin e Kiwanis ‘Blast from the Past’ Nostalgia party, cu musica di decada ’60, ’70 y ’80, y na September 2022 tabata tin e prome Kiwanis Palm Beach ‘Over the Moon’ Golf Event. E ultimo activad aki tabata un torneo di Golf nocturno cu tabata un experiencia inolvidabel y masha dibertido pa e participantenan.
E Presidente saliente a expresa su gratitud enorme na ambos tur e Sponsors cu di un forma of otro a contribui na actividad pa recauda fondo di Kiwanis Club of Palm Beach y na tur e boluntarionan miembro cu a traha riba e iniciativanan aki.
Na e banda di servicio na comunidad a resalta e traspaso oficial di e programa “Stimami Guiami” di Kiwanis Club of Palm Beach pa Fundacion pa Nos Muchanan. Stimami Guiami (Stima bo Yiu, Guia bo Yiu) ta un Programa Educativo pa mayornan unda ta enfoca riba mehoracion di e laso entre bo persona y bo yiu. E programa aki a inicia na 2021 como un colaboracion entre Kiwanis Club of Palm Beach, Wit Gele Kruis, Tienda di Educacion, Fundacion Pa Nos Muchanan y Fundacion Respeta Mi. E programa ta pa mayor na estado of cu baby recien naci te cu 4 aña di edad, y ta brinda informacion y asistencia den tur aspecto di cuido y guia pa yiu durante un fase di desaroyo importante.
Despues di un fase piloto na 2021 y 2022, e partnernan unanimamente a dicidi cu, pa garantisa continuidad y crecimento, lo ta optimal si e programa worde hancra den un organsiacion den e sector social y cu capacidad pa carga e parti logistico cu e programa ta demanda. Asina a bin na un acuerdo cu Fundacion pa Nos Muchan lo tuma e encargo di e programa pa futuro. Na 2022-2023 Kiwanis Club of Palm Beach lo keda duna aporte financiero na e programa aki for di e fondonan cu ta worde recauda.
Finalmente e Presidente saliente a conmemora cu na 2022 a inicia un programa nobo di “Terrific Kids” na Colegio San Antonio. Tambe a continua esaki na St. Dominicus College y St. Franciscus College. Kiwanis Terrific Kids ta un programa di Kiwanis Internacional di reconocemento escolar cu ta promove desaroyo di balornan manera caracter personal, autoestima y perseverancia. Studiantenan den e programa ta traha cu nan maestro pa establece metanan pa mehora comportacion, contacto cu otro, presencia y/of trabao escolar. E Presidente saliente a gradici e scolnan y specificamente e maestronan pa e bon cooperacion di e aña cu a pasa.
