Minister Xiomara Maduro:
ORANJESTAD (AAN): Durante e bishita di trabou na Hulanda, Minister Maduro a reuni tambe cu Centraal Planbureau (CPB) cu ta e instancia cu ta calcula e impacto financiero di e plannan di gobernacion na Hulanda na man di diferente modelo.
CPB ta haci uzo di diferente modelo pa asina por calcula e impacto financiero y social di e plannan di gobernacion y ta brinda asina un guia na mandatarionan pa por sa di adelanta e impacto di nan decisionnan. Na Aruba debi na e escala chikito di nos Pais, nos no tin un instancia manera CPB. Nos ta traha cu e modelo macro-economico MARUBA pa calcula e impacto riba e crecemento economico.
Pa Aruba ta importante pa banda di e modelo macro-economico, nos por haci un calculo mas refina riba, por ehempel, nos entradanan di impuesto. Cu ehecutivonan di CPB a repasa cual ta e asistencia cu ta posibel pa asina na Aruba tambe nos por desaroya modelonan cu ta yuda pronostica e impacto di decisionnan.
