Premio Cultural Playa Pabao lo wordo otorga na Hector ‘Chichi’ Perez

ORANJESTAD (AAN): Dialuna 18  di Maart venidero, directiva di Centro di Bario Playa Pabao

ta organiza su tradicional actividad “un atardi cultural den bario”, E actividad aki ta cuminsa 12:00 pm pa 6:00 pm. Lo tin presentacion di diferente grupo di baile hubenil, solistanan, baile di cinta bao direccion di Lia Lopez y poetanan. Bar y cushina lo ta bon sorti. Durante e actividad aki ta bay honra sr Hector “Chichi” Perez pa su participacion den e deporte di judo y tanchi Lia Lopez pa tur loke el a haci pa tene nos cultura bibo.

   Hector Perez, mihor conoci como Chichi Perez, a nace na Santo Domingo dia 13 di November 1939.  El a yega Aruba cu 6 aña di edad y a sigui su estudio na Aruba.  E ta casa y e tin tres yiu.

   Hector a cuminsa haci e deporte di judo na un edad hoben y a obtene e grado di Derde Dan Black Belt den judo.  Hector a duna les di judo durante 35 aña, entre otro na Centro di Bario Playa Pabao. Den e deporte di judo Hector a representa Aruba como coach y alaves sportmasseur na e weganan olimpico di Seoul na Corea den aña 1988.

   Sr Perez a bira referee Internacional di judo y a fungi den diferente competencia internacional manera weganan Panamericano, Sur Americano y Centro Americano y den Caribe durante aña 1988 pa 2003. Paisnan cu el a funciona como referee ta Canada, Merca, Ecuador, Colombia, Venezuela, Argentina, Brazil, Cuba, Republica Dominicana, Curaçao y Bonaire.

   Hermana Isla di Bonaire a dune un reconocemento pa stimula y yuda engrandece e deporte di judo na Bonaire y e relacion di judo entre e islanan di Aruba, Curaçao y Bonaire.

  Aruba Sports Award a condecora Hector Perez como official di aña den aña 1994.

   Hector Perez tambe ta un musico y ta acompaña cu su guitara y canta den Coro La Escala for di aña 1987.Actualmente e ta e director di Coro La Escala y ta mantene su mes ocupa dunando presentacionnan pro deo na e casnan di nos grandinan manera Maris Stella, Saba SN, St. MIchael Paviljoen, Cas Marie, Cas Mariazul, Favi, Hospital y Centro di Barionan.

   Su ultimo actuacion tabata e siman aki na Saba San Nicolas y na Cas Marie.