Celebracion 18 di maart 2024 lo ta grandi na Piedra Plat

ORANJESTAD (AAN):  Cinco organisacion ta uni pa haci e evento grandi aki.

C.B. Piedra Plat, Centro Famia Piedra Plat, Fundacion Car-Ritmo, SV Britannia y Roller Skate Aruba.

            Lo tin un programa cu lo deleita grandi y chikito, cuminsando for di 9 or di mainta cu un koffie morgen y weganan di football pa mucha, tentnan cu benta di artesania, cos dushi, Pasa boca criollo, mata y mucho mas. Tambe lo tin apertura di un speeltuin nobo cu dino jump pa e muchanan y weganan popular pa tur edad y lo tin un espacio apart pa practica roller skate pa mucha y adulto.

            Show cultural ta cuminsa 1:00pm. cu diferente banda musical y bailenan folklorico. Lo tin tentnan grandi pa sinta come y disfruta di e show cultural.

            Pa 4:30pm lo tin e famoso balansamento di auto cu chens pa gana premionan.

E actividad completo lo tuma lugar ariba e parkeerplaats di C.B. Piedra Plat/CDFB y lo termina pa 6:00 PM.

            Ta invita e pueblo di Aruba en general y tur e habitantenan di e bario di Piedra Plat y vecindario pa bin celebra y disfruta nos dia di Himno y Bandera 18 di maart 2024.