Folklore ta nifica saber y riqueza di pueblo cu ta ser studia pa antropologonan.
Esaki ta realmente un palabra ingles cu nos a tuma y uza durante varios siglo caba, den tur sorto di idioma. Den neologismo (uzo di palabranan nobo den un idioma) folklore ta tradicionnan y custumbernan di un pais.
E folklore di Aruba por worde interpreta na e siguiente manera: “Sabidura di un pueblo, cu nunca a ser skirbi, sino tuma directamente for di boca di pueblo, den su forma autentico”. Esaki pasobra hopi ta nos grandinan cu ta tumando nos folklore y cada uno ta trece dilanti na nan manera y poco poco ta modernize.
Folklore ta un conhunto, un union di tradicionnan, poesia, leyendanan, etc.di di un pais.
Tambe musica ta inclui den nos tradicionnan foklorico. Folklore ta un saber cu ta nace den e pueblo y cu ta progresa y sigui di generacion pa generacion. E tradicion aki, desde siglonan ta algo cu na nacionnan progresistia ta ser cuida y warda como relquia. Aki na Aruba esaki casi ta ser neglisha y quizas esaki por ta sinta den esnan cu tin poco aprecio pa loke ta di nos mes cultura.
Un tradicion verbal por pasa bay, pero nos musica folklorico tin cu ser conserva, nos tradicionnan musical ta un di e partinan mas eleva di nos cultura.
Ta ser bisa pa un gran cantidad di persona cu nan no ta gusta musica folklorico Arubano, pero si nan ta aprecia mas e musica importa, cu hamas por ta mihor cu esun di nan propio nacion.
Otro factor quizas cu tambe tin di haber cu esaki ta cu masha poco joven ta interesa den dal musica y nan no ta worde guia tampoco pa haci esey.
E ultimo añanan por a ripara cu hopi mas hoben ta interesa den e festival di himno y bandera tanto den e juvenilnan como den e grandinan. Tambe cu hobennan ta forma grupo di bailenan pa asina presente bailenan folklorico. Esey sigur ta di aplaudi ya cu poco poco e pueblo ta bay bek na nan raiz y ta cuminza stima nan folklore y pasando e pa nos futuro generacionnan.
