Premier Hulandes Dick Schoof a haci un recorido den Centro Coreccional Aruba

ORANJESTAD (AAN): Den cuadro di su bishita oficial di trabao na Aruba, Prome Minister di Hulanda, sr. Dick Schoof, y

Minister di Husticia di Aruba, mr. drs. Arthur Dowers, a bishita Centro Coreccional Aruba (KIA) na Santo di Patia.

Durante e bishita, Director di KIA, sr. Erik Teepe, a guia e delegacion riba un recorido den varios area di e instituto coreccional. Prome Minister Schoof a haya un bista di e estado deteriora den cual e instituto ta opera actualmente, y e falta urgente di inversion den infrastructura, siguridad y bienestar di e detenidonan y personal, pa garantisa cu Aruba ta cumpli cu e normanan internacional cu un centro coreccional moderno mester mantene.

Minister di Husticia Arthur Dowers a keda babuca pa e nivel di deterioro durante e recorido. Segun e mandatario di Husticia, e institucion awe ta hopi mas pio cu 15 aña pasa, na momento cu e la bira Minister di Husticia. E situacion actual, segun Minister Dowers, ta un resultado di falta di vision, desinteres y mal maneho durante e ultimo 7 añanan, particularmente alarmante tumando na cuenta cu e minister di husticia anterior mes tabata ex-director di KIA y conoce di cerca e reto y necesidadnan di e instituto.

E bishita a duna un bista real di e necesidad urgente di inversion y maneho pa duna KIA e rol di coreccion institucional cu e mester tin. Gobierno actual, lidera pa un gabinete cu ta pone integridad, humanidad y husticia central, ta determina pa tuma e pasonan necesario pa mehora e situacion y traha na un solucion sostenibel y duradero.