Mientras naturaleza di Aruba ta confronta peligro di barconan bieu
*E regreso di loke hende ta manda espacio mester bira topico mundial
*E alarma pa e capsula espacial cu mester a regresa mundo siman pasa
ORANJESTAD(AAN)—Den un mundo cu computer a regala comunicacion continuo y directo, ainda hopi suceso ta tuma lugar, sin ricibi atencion debido di publico.
“Ta sumamente importante pa publico ta bon informa pasobra ta preocupacionnan publico ta uno di e factornan cu ta resulta den accion di gobernacion.”
Esaki ta opinion di un informante importante cu ta papia di peligronan serio den e comunidad mundial moderno, cu ya no ta preocupa su mes cu loke un siglo pasa lo a pone henter mundo na careda.
Siglo 20 a bira e siglo di cambio grandi pa hende, cu a conkista espacio. E exploracion di espacio, di luna, planetanan cu tabata parce mundo inalcansabel pa hende, a culmina na e momento cu hende a planta bandera riba luna.
Progreso espacial a bira cos di tur dia y ta kita atencion di hende di peligronan cu ta parce imposibel.
DIARIO den combersacion cu informantenan ta topa cu e posicion publico cu cierto topiconan sumamente importante den mundo moderno, no ta haya e atencion cu nan merece sigur si midi nan importancia pa un pais manera Aruba.
E prome acusacion serio ta bini contra e loke ta wordo considera un falta pa un peligro masha serio pa Aruba cu ta e posibilidad di entre otro derame di petroleo a base di barconan bieu cu ta wordo uza pa transporta petroleo.
Aruba na diferente ocasion mester a bati alarma pa e peligro grandi di manchanan di petroleo di laman, cu segun informantenan ta un peligro creciente teniendo na consideracion e cantidad di barconan bieu cu ainda ta transporta petroleo y na cierto ocasionnan no ta yega tera.
Un asunto cu sigur mester haya mas atencion na Aruba cu tambe mester cuminsa duna atencion na e forma viahenan espacial cu a bira algo normal na mundo, por causa problema serio pa e pais.
For di momento cu hende a cuminsa cu conkista di espacial cantidad di obheto, capsula, raket, a wordo manda den espacio.
Ora ta trata di raketnan cu por transporta hende ainda tin atencion con nan ta regresa. Pero pa loke ta trata loke ta manda espacio sin hende, tin descuido serio, cu por provoca incidente cualkier momento.
Siman pasa mundo tabata alerta pa regreso di un capsula espacial cu tabata tin 50 aña den orbita.
Un obheto cu un meter di hanchura, cu tabata move cu un velocidad di 250 kilometer pa hora, por a cay na cualkier lugar na mundo, loke ta nifica cu e por a topa cu cualkier ser humano den su caminda.
E informacion di e capsula aki, cu finalmente lo a cay na mundo sin produci ningun problema pa bida di hende, a hiba DIARIO na informantenan den e parti Noord di region di Caribe y tambe e parti Sur di Estados Unidos, caminda varios informacion ta nace di e obhetonan cu diripiente ta cay for di cielo.
Manera ta conoci e punto di partida ta cu loke bay espacio ta kima na cierto momento y no ta regresa tera sin mas.
Informacionnan concreto di NASA ta papia di un averahe di un pida di resto di loke a wordo manda espacio cu ta alcansa mundo cada dia durante ultimo 50 aña.
Con grandi e restonan ta, no ta conoci. Te awor no tabata tin daño considerabel di loke no a kima ora tabata regresa planeta tera.
E hecho cu e material generalmente ta kima ora e regresa mundo for di espacio, tambe por aporta na polucion.
Informacion di NASA ta papia di obhetonan espacial cu a bolbe tera y a wordo descubri y cu segun nan diseño mester a contene combustibel of gas.
Informacionnan cu DIARIO a logra compila ta indica cu den e region Norte di Caribe, na varios ocasion a registra obhetonan cu ta “cay for di cielo”.
Na cierto partinan di Merca, tambe mencion ta wordo haci di loke espacio ta debolbe na hende pero no ta haya atencion.
DIARIO ta keda den contacto cu informantenan cu ta conclui, cu e momento a yega pa cuminsa duna atencion na e fenomeno aki cu un espacio cu ta yena cada dia mas cu restonan di artefacto cu hende ta manda espacio y cu silenciosamente a cuminsa debolbe mundo parti di loke no por destrui su mes.
Siman pasa pues mundo tabata en espera di un capsula cu mester a alcansa planeta tera y asina a bira advertencia pa “sushi espacial”cu por resulta na cualkier lugar na mundo cu no ta duna informacion necesario na peligronan cu progreso cientifico ta produci.
