Minister Geoffrey Wever a reuni cu representante di comerciante di galiña di Colombia

Ta explorando posibilidad pa importacion:

*Actualmente ta prohibi pa importa carni di galiña for di Colombia pa Aruba 

ORANJESTAD (AAN): Dialuna mainta ultimo, minister Geoffrey Wever y minister Mervin Wyatt-Ras a reuni cu e representantenan di comerciantenan di galiña di Colombia. Den cuadro di e Programa di Gobernacion, unda lo busca tur manera pa mehora poder di compra y baha prijs di producto, e Departamento di Asunto Economico, Comercio y Industria (DAECI) ta sondeando tur posibilidad cu tin pa por haya carni di galiña na un mihor prijs y na e calidad cu nos comunidad ta exigi.

   Den e ultimo lunanan e produccion local a conoce un reduccion y e prijs di webo importa procedente di Merca tambe a aumenta drasticamente. Pa motibo aki, Minister Geoffrey Wever a otorga permiso pa importa webo for di, entre otro, Colombia cu a resulta den un efecto positivo riba obtenibilidad y prijs pa consumidor na Aruba, mientras cu localmente ainda no tin suficiente produccion pa cubri full e mercado local.

            Minister Wever ta na e momento aki trahando pa stimula empresarionan local pa hisa e produccion di webo local, pero e no ta bay di un dia pa otro. Mientrastanto, ta busca otro forma pa trece producto na un prijs reduci. 

   Colombia tin e calidad, volumen y distancia cortico di transporte cu ta haci un opcion vital pa diferente producto, entre otro, di webo y di carni di galiña, y na prijs potencialmente mas bentahoso. Di parti di gobierno di Aruba, tin e boluntad pa fortifica nos aliansa regional cu Colombia, cual pa colmo ta e di seis (6) productor di webo mas grandi na mundo y a prueba di ta cumpli cu reglanan sanitario riguroso pa asina por exporta su producto pa diferente pais mundialmente. 

Actualmente ta prohibi pa importa carni di galiña for di Colombia pa Aruba

Esaki a nota durante e reunion. Similar na e prohibicion di carni di baca, lo mester encamina un proceso di certificacion den colaboracion cu e exportadornan pa asina por haci esaki posibel. E proceso di certificacion ta un responsabilidad cu ta cay bou di minister Mervin Wyatt-Ras, encarga cu Salubridad Publico, kende tambe tabata presente den e reunion.

   Minister Wever y Minister Wyatt-Ras a indica cu Gobierno di Aruba ta dispuesto pa encamina e proceso pa habri caminda pa importacion di carni di galiña for di Colombia. Tin e experiencia for di tempo cu minister Wever a lidera un Trade Mission pa Colombia. Ey a inicia e combersacion y proceso di certificacion pa carni di baca procedente for di Colombia, cual ta den un fase final pa realiza. Pa importacion di carni di galiña, conhuntamente cu ministerio di salud, lo explora e posibilidad pa importa for di Colombia, condicional na rekisitonan sanitario exigi pa Aruba, cu ta sigui norma di Union Europeo y Merca.

   "E calidad, disponibilidad, prijs, transporte y otro factornan ta hopi faborabel. Aunke un isla chikito, debi na e cantidad di consumo local y di turismo, tin probecho pa ambos e local como comerciantenan di galiña di Colombia tambe; un beneficio mutuo". Minister Geoffrey Wever ta gradici e representantenan di comerciantenan di galiña di Colombia pa e encuentro ameno y a indica di "lo keda explora cooperacion pa beneficio mutuo cu nos bisiña, Colombia."