Cooperacion cu Stadsarchief Amsterdam uno esencial
ORANJESTAD (AAN): Durante su bishita oficial na Hulanda, Prome Minister mr. Mike Eman, hunto cu su delegacion, a bishita Stadsarchief Amsterdam, diamars mainta; un di e archivonan municipal mas grandi y mas prestigioso na Hulanda. E bishita tabata enfoca riba intercambio di conocemento y pa fortalece cooperacion internacional den e area di preserva patrimonio historico y digitalisacion di documento den un archivo.
Durante e reunionnan, e delegacion di Aruba a haya oportunidad pa conoce di cerca e metodonan y sistema avansa cu Stadsarchief Amsterdam ta aplica pa conserva y maneha documentonan historico. E bishita ta den cuadro di e vision di Gobierno di Aruba pa sigui modernisa y fortalece Archivo Nacional Aruba, cu actualmente ta den un proceso importante di renovacion y digitalisacion.
Prome Minister Mike Eman a enfatisa cu Aruba ya ta reconoci internacionalmente pa e trabao innovador cu ta haci den digitalisacion di su archivonan historico. Segun e Prome Minister, cooperacion cu institucionnan manera Stadsarchief Amsterdam ta habri caminda pa intercambio di experiencia, tecnologia y conocemento cu lo beneficia generacion presente y esnan futuro. “Nos historia ta forma parti di nos identidad como pueblo. Preserva y haci e historia accesibel ta un inversion den educacion, investigacion y desaroyo cultural di Aruba,” segun Prome Minister Mike Eman.
Durante e bishita, tambe a papia tocante diferente documentonan historico relaciona cu Aruba cu ta conserva na Hulanda. Entre nan tin varios documento for di siglo 16, incluyendo algun cu ta hacireferencia na Aruba for di aña 1523. Actualmente, varios di e documentonan aki ta den proceso di digitalisacion, cu eventualmente lo permiti cu Aruba y investigadonan internacional haya acceso mas facil na nan contenido.
Gobierno di Aruba ta mira e cooperacion aki como un paso importante den su compromiso pa fortalece acceso na informacion historico y pa conserva patrimonio di Aruba pa futuro.
Ademas, den cuadro di e fondo di compensacion pa sclavitud, Gobierno di Aruba a destina recurso pa varios proyecto cultural y historico, incluyendo restauracion di e tankinan historico di Kibayma cu lo fungi como centro di Archivo Nacional Aruba. Tambe ta trahando riba un publicacion historico hunto cu Luc Alofs y creaccion di un monumento dedica na un hende muhe Arubiano cu a lucha contra sclavitud kende awendia por considera un heroe.
Gobierno di Aruba ta sigui comprometi na promocion di nos historia, preservacion di patrimonio cultural y fortalecemento di cooperacion internacional den beneficio di pueblo di Aruba.
