Minister di Salubridad a ricibi bishita di Dutch Caribbean Hospital Alliance

Pa fortalece cooperacion regional den sector di salud

ORANJESTAD (AAN): Minister di Salubridad, Asunto Social, Cuido di Adulto Mayor y Maneho di Adiccion, sra drs. Melvin Wyatt-Ras, a ricibi recientemente un bishita di representantenan di Dutch Caribbean Hospital Alliance (DCHA), hunto cu representantenan di Hospital Horacio Oduber (HOH), pa un encuentro enfoca riba cooperacion regional y intercambio di conocemento den sector di salud.

   Representantenan di DCHA, bou di liderazgo di presidente Dr. Felix Holiday, a reuni cu e minister pa un dialogo tocante colaboracion den cuido medico regional. Durante e encuentro, DCHA a presenta su Plan multianual 2026-2030 na e minister. E plan aki ta enfoca riba mehoracion di calidad di cuido, desaroyo di capacidad profesional, innovacion y sostenibilidad di sistema di salud den Caribe Hulandes.

“Cooperacion regional ta esencial pa sigui fortalece nos sistema di salud y garantisa cu nos comunidad ta haya acceso na cuido di calidad. Nos ta aprecia colaboracion continuo entre e diferente institucionnan den Caribe Hulandes y e presentacion di e Plan multianual 2026-2030 ta un paso importante den direccion di innovacion, sostenibilidad y conocemento comparti,” asina Minister Wyatt-Ras a declara durante e encuentro.

   DCHA ta un aliansa di cooperacion entre hospitalnan general na Aruba, Curaçao, Sint Maarten y Bonaire, hunto cu centronan medico na Saba y Sint Eustatius. E aliansa ta promove cooperacion y intercambio di experticio entre institucionnan medico den Caribe Hulandes.

   Minister Wyatt-Ras ta aprecia e bishita y e intercambio positivo cu a tuma lugar durante e encuentro. Ministerio di Salubridad ta considera cooperacion regional como un elemento importante pa un sector di salud solido y sostenibel.