Ministro Geoffrey Wever:
ORANJESTAD (AAN): Minister di Finansa, Asunto Economico y Sector Primario, mr. Geoffrey Wever, ta anuncia introduccion di uzo di un carnet anual pa productornan comercial di agricultura, cria di bestia, piscamento y apicultura ora di importa. E meta di e maneho nobo ta pa mehora e proceso administrativo di importacion pa productornan comercial den Sector Primario y asina baha e “red tape” of burocracia den e proceso di importacion. E carnet ta simplifica e prueba administrativo entre Santa Rosa y Departamento di Aduana sin compromete e controlnan existente.
E proceso existente di importacion ta consisti di pidi na Santa Rosa un carta oficial pa cada “order of shipment” di producto cumpra internacionalmente. Esaki ta encera cu por ehempel si den un luna tin 4 “order of shipment”, e productor comercial den sector primario mester pidi y haya confirmacion di Santa Rosa 4 biaha. Despues di ricibi e carta oficial, e productor comercial den sector primario mester entrega esaki na Departamento di Aduana pa por importa e productonan sin paga invoerrechten. Esaki ta un ripiticion administrativo cu ta tuma hopi tempo y no ta eficiente.
Pa mehora e proceso di importacion pa produccion comercial den Sector Primario lo introduci un mecanismo di validacion anual, tipo “carnet” pa productornan comercial di Sector Primario cu ta registra na Kamer van Koophandel (KvK) y Santa Rosa. E introduccion aki ta conta pa productor comercial den agricultura, cria di bestia, piscamento y apicultura. E ta e prome fase di un strategia mas amplio.
Uzo di e carnet tin como requisito cu e director of propietario registra na Kamer van Koophandel mester aplica. E carnet lo ta mara na nomber y lo mester wordo renoba tur aña pa confirma cu e productor ta activo ainda y debidamente registra. Pa cumpli cu ley, tur importadornan mester ta registra como productor comercial na Kamer van Koophandel y DLVV “Santa Rosa”, entrega documentacion relevante na momento di importacion, y declara cu e mercancia ta destina exclusivamente pa uzo den sector primario. Departamento di Aduana ta keda e autoridad cu ta verifica si e condicionnan legal ta wordo cumpli y por haci control despues di importacion.
Productornan no-comercial no ta inclui den e prome fase door cu mester un cambio di ley pa por inclui e productornan cu no ta activo comercialmente bou di e maneho nobo aki. Gobierno ta reconoce e importancia di e productornan no-comercial cu ta activo den Sector Primario; e comunidad amplio di cultivado y criado di bestia (incluyendo cunucero nan den scala chikito, tradicional of cu parcialmente ta biba di nan cosecha) y pa nan, un segundo fase ta den preparacion caba y lo wordo anuncia pronto.
Nan tambe ta parti esencial di e cadena di suministro di cuminda y di nos identidad. Minister Wever a indica “E meta den termino largo ta pa fortalece e sector y pa asisti tur esnan cu ta forma parti di Sector Primario, pa gradualmente nan por contribui structuralmente na nos siguridad alimentario y acceso na cuminda saludabel.”
Den e prome fase, DLVV “Santa Rosa” lo organiza e entrega di e prome carnets pa productornan comercial via un sistema di cita. Pronto e administratie di Santa Rosa lo contacta e productornan pa informa nan e dia y orario pa (saca/trece potret, firma e voorwaarden y) ricibi nan carnet oficial. Pa registra mester trece ID, informacion di tereno y un registro valido di Kamer van Koophandel.
Sector Primario den su totalidad, ambos comercial y no-comercial, ta un pilar importante di nos pais, no solamente como parti di nos tradicion, pero tambe como un motor relevante pa nos economia y desarroyo local. Minister Wever ta enfatisa cu e iniciativa ta parti di un esfuerso mas amplio pa fortalece Sector Primario y nos economia mientras cu ta mantene transparencia y cumplimiento cu ley.
Minister Wever kier gradici DLVV “Santa Rosa” y Departamento di Aduana, pa tur e cooperacion pa haci esaki un realidad pa e bienestar di e Sector Primario.
