Precioso Parada di Mascarada di Savaneta cu a laga tur hende encanta

ORANJESTAD (AAN) Diabierna anochi a tuma lugar e Parada di Mascarada di Savaneta, organiza pa Fundacion Savaneta Prome Capital, presidi pa señor Norman Thijsen.

   Un cantidad grandi di personanan di Distrito di Savaneta y alrededor, y tambe di otro distritonan a bay na e parada aki, y a keda sorprendi y asina bon impresiona, cu nan no a bay ningun otro parada di carnaval, pero a keda na esun di Savaneta.

Algo hopi bunita tabata e participacion di e clientenan di FUNARI cu nan rolstul electrico. Algo di admira.

   Un evento super bunita, cu participacion di Brass Band Savaneta y varios mas cu a bin toca na un manera espectacular. Tabata tin su propio reinanan infantil, hubenil, adulto y señora Carnaval, na un forma unico, y e publico grandi cu a bin disfruta di dje tabata hopi contento mes. Algo cu yama atencion, y sigur di e bishitantenan cu no ta di Savaneta, ta e amabilidad di e habitantenan di Savaneta, cu tabata comparti awa y refresco cu esnan cu a bay mira, y cu nan no conoce mes.

   Un bunita ehemplo di cortesia a haci di e Parada di Mascarada aki uno mas special ainda cu a laga tur hende encanta. Comentarionan cu a yega na mesa di redaccion ta exalta e bunita iniciativa aki di Fundacion Savaneta e Prome Capital, y di e habitantenan di e distrito aki. Hopi pabien!