Esey tabata un conferencia di implementacion y no solamente di palabra’

Balkenende encuanto Conferencia di Bon Comun:

ORANJESTAD (AAN): Jan Peter Balkenende, ex-Prome Minister di Hulanda y un di e oradornan principal di e evento, a describi e Common Good Conference como un momento di inspiracion y accion concreto. Segun Balkenende, e conferencia a mustra un combinacion unico entre teoria y practica, cu ta duna sentido real na e concepto di bon comun.

   “E bon comun ta semper importante, pero awe nos a mira un combinacion di teoria y practica. Esaki a mustra cu algo realmente ta pasando na Aruba,” Balkenende a bisa.

   El a destaca cu e ceremonianan di firmamento di MOUs cu a tuma luga durante e conferencia tabata specialmente significativo, ya cu nan a clarifica cu e iniciativa no ta keda na palabra solamente, pero cu accion concreto ta tuma luga.

   “Bo por papia riba sostenibilidad y balor, pero e pregunta semper ta: kico lo cambia? Awe mi a mira cu cambio ta realisa,” segun Balkenende.

   Segun e ex-Premier di Hulanda, e nivel di e preguntanan for di e publico a confirma e caracter practico di e conferencia. Mayoria di e preguntanan tabata enfoca riba implementacion y con pa traduci ideanan den accion real.

   “E preguntanan tabata riba loke mester haci den practica. Esaki tabata un conferencia di implementacion,” el a enfatisa.

   Balkenende a subraya cu loke ta pasa na Aruba no ta solamente relevante pa e isla mes, pero tambe pa otro islanan den region y mas aya, incluyendo Hulanda. El a indica cu colaboracion y intercambio di experencia ta esencial pa logra progreso duradero.

   “Ora nos papia riba e bon comun, nos mester uni forsa. Esey no ta un asunto aisla pa Aruba, pero un reto global,” el a bisa.

  El a comparti cu su bishita na e exposicion di iniciativa local a duna hopi conocemento, comparando e experiencia positivamente cu otro evento similar cu el a experimenta anteriormente na Zuid Korea. Segun Balkenende, Aruba a mustra cu tin un gran cantidad di iniciativa local cu ta crea e cambio cu nos kier mira.

   E ex-Prome Minister a conclui expresando su satisfaccion cu e resultado di e conferencia y a felicita e ekipo organizado, describiendo e evento como inspirado y relevante pa futuro di sociedad, tanto na nivel local como internacional.