Post Aruba ta anfitrion di tayernan pa e region postal di Caribe

ORANJESTAD (AAN): Den cuadro di proyectonan internacional di e Union Postal Universal;

e Union Postal di Caribe hunto cu United States Postal Services lo tene un siman di tayernan na Aruba entre 29 di agustus te cu 2 di september 2022.

            E prome tres dia lo duna e tayer relaciona cu e proyecto di Electronic Advance Data (EAD) y Customs Declaration System (CDS).

            Pa mehoracion di e seguridad y tambe pa haci e proceso rapido, na momento di manda un paki of carta via post (na tur post rond di mundo) a bira obligatorio pa transmiti data pa e pais di destino for di adelanta den un formato electronico yama Electronic Advance Data. E data aki ta encera entre otro; e nomber y adres di e persona cu ta manda y esun cu ta ricibi, y informacion di e contenido di e paki.

            For di 2021, tur persona cu manda paki pa otro pais mester cumpli cu e rekisito aki.

E Customs Declaration system ta e sistema cu e oficinanan di Post ta uza pa transmiti e datonan aki.

            E tayer aki  di EAD y CDS lo inclui modulonan basa riba e enfoke strategico pa e maneho di infromacion electronico avansa y e-commerce, un vision general riba CDS y e siguiente pasonan pa e region Caribense den infromacion electronico avansa.

            Riba e ultimo dos dia lo conduci e tayer di EMS cual lo enfoca tambe den e cumplimento di transmicion di datonan electronico, den mehora e conocemento di e standards di EMS, analysis di reportenan y e mehoracion di calidad en general pa cu e servicio di EMS.

            Pa e tayernan aki tin e presencia di mas cu 30 participante internacional di 22 diferente isla caribense y tambe Merca, y 12 participante di Aruba kendenan lo ricibi training y lo wordo capacita pa cumpli cu e proceduranan di Union Postal Universal.

            Tur costo pa cu e evento aki y pa e participacion di tur e islanan di Caribe a wordo patrocina pa United States Postal Services.

            E servicio postal di Aruba a cumpli su di 130 aniversario e aña aki.

Antes Aruba tabata forma parti di e servicio postal “Colonia Curacao” y su directiva tabata poseciona na Curacao. Ora Aruba a bira un estado separa dentro di Reino Hulandes na januari 1986,  oficina Postal a drenta simultaneamente den e Status Aparte y a converti den un servicio postal independiente.

            Dia 1 di september 2005 a independisa e departamento den un compania priva, Post Aruba N.V. cu su oficina principal situa na Oranjestad, pero cu un oficina adicional na San Nicolas. Ey ta ofrece tur tipo di servicio, for di manda un envelop, te na carga pisa, sin lubida nan Servicionan Corporativo y di online shopping via E-Post y.

            Ademas di esakinan, Post Aruba ta trahando riba proyectonan pa pronto lansa servicionan nobo riba mercado adapta na e necesidadnan actual di nos comunidad.