Colegio Conrado Coronel contento di a ricibi bishita di Minister di Enseñansa

ORANJESTAD (AAN): Siman pasa Minister Endy Croes a bishita Colegio Conrado Coronel.

Na yegada e mandatario a wordo calurosamente ricibi pa cabesante di scol, sra. Lourdes Vries, sr. Frank Dirksen, docentenan y pa e mas di 400 alumno di scol preparatorio y basico.

            E alumnonan a canta masha bunita pe mandatario. E dignatario a hiba palabra na unda cu e la desea e alumnonan como tambe e docentenan un exitoso aña escolar 2022-2023. Como tambe e mandatario a gradici e docentenan pa nan tremendo trabou cu nan ta desplega pa educa nos muchanan.

            Despues di e caluroso bon bini e mandatario a reuni cu cabesante di e scol, sr. Lourdes Vries pa scucha e inkietudnan como tambe peticion y deseonan di e scol. Na final di e reunion e mandatario a pasa diferente klas pa saluda alumno y docentenan.

            Sra. Vries a expresa cu pa e alumnonan e tabata un momento hopi special pa nan mira Minister na nan scol, nan dilanti combersando cu nan, ta algo pa un mucha ta increibel.

            Sra. Lourdes a enfatisa cu algun di e alumnonan conoce Minister Endy Croes caba door di deporte paso e scol a participa den Weganan Escolar. Cabesante di e scol a expresa di ta hopi contento cu e bishita di mandatario di Enseñansa na Colegio Conrado Coronel.

             Finalisando Minister Endy Croes ta tur alumno y docentenan un exitoso aña escolar 2022- 2023 yena cu positivismo y bendicion. Enseñansa ta e yabi pa futuro.