E di cuater edicion di ‘Long Table’ Aruba a resulta den un anochi magico cu a culmina c'un donacion di $90,000

Wind Creek Aruba dunando bek na comunidad

ORANJESTAD  (AAN):  Long Table Aruba, un evento culinario caricativo presenta door di Wind Creek Aruba a surpasa tur expectativa celebrando e di cuater edicion diadomingo ultimo. E unico cena balora na $40.000 pa Aruba, Long Table a presenta un cena completamente na blanco na 1000 persona y anuncia e ganador absoluto cual a keda den nomber di esta Animal Welfare Alliance Aruba di $40.000 cu a ricibi mas voto.

            E regreso di Long Table e aña aki no solamente ta wordo celebra como un re-introdukshon di e evento despues di 2 aña sino tambe e existencia di 5 aña di Wind Creek Hospitality na Aruba. Pa reconoce y celebra e gran ocasion aki, Wind Creek Aruba a premia un paar di fundacion nan cu a particpa den un video contest entre 10 pa 24 di Augustus ultimo.

            E mision di Wind Creek ta, pa ta presente y envolvi den e comunidad cu nos ta biba y opera aden asina Sr. Paul Gielen, General Manager di Wind Creek Aruba a declara. E evento aki ta un celebracion di nos proposito y e aña aki Long Table Aruba a surpasa tur expectativa. Mi no por ta mas orguyoso di tur loke nos a logra awe nochi y con nos comunidad a bin hunto pa sostene nos instancianan caricativo.

            E gran ganador di e premio maximo di $40.000 a resulta Animal Alliance Aruba, un instancia caricativo cu ta dedica na adopcion y sterilacion di cacho y pushi. Cu e donacion aki Animal Welfare Allaince Aruba lo inicia su propio clinica di sterilisacion. Aruba Animal Shelter a keda na 2ndo lugar y a ricibi $10.000 pa por sigui cu nan bon trabou y mision pa mehora e calidad di bida di cacho y pushinan na Aruba.  

            Mirando e acogida inmenso durante di votacion di e videonan, Wind Creek Aruba a premia 4 organisacion extra di sorpresa cual kada un a ricbi $10.000

Stichting BOB Aruba

Pasadia Bibito Pin

Fundacion Arubano di esnan Visualmente Incapacita

Cas di Cultura

            Desde e prome dia di Wind Creek na Aruba na aña 2017,  impacto comunitario y ayudo den temponan dificil ta e pilarnan di e operacion di Wind Creek Aruba su propiedadnan. Como e evento mas significativo, Long Table Aruba a recauda den e prome tres añanan mas cu $75,000  pa instancianan caricativo na Aruba.

            Cu e exito di e evento di e aña aki a surpasa e total di e suma di añanan anterior y ta yega na un total di $165,000 pa Aruba 

            "Mi ta kere loke cu ta destaka y ta hasi Long Table Aruba un evento unico no ta solamente e manera cu nos ta yuda nos instancianan local pero tambe con e ta trece e team completo di Wind Creek Aruba hunto.

            Nos ta asina afortuna di por mira e impacto positivo cu Long Table Aruba tin den tur cu ta envolvi, di empleadonan pa guestnan pa fundacionan local y tur nos patrocinadornan, nos ta sigui conta cu tur e sosten durante añanan venidero, asina Sr. Paul Gielen ta termina bisando.

Masha Danki!

            Pa loke ta e ‘Long Table’, Wind Creek Hospiality a ricibi cooperacion pa cera e caminda ya caba for di 12’or di merdia pa realisa e setup di e mesa largo cubriendo un parti di L.G. Smith Boulevard.

            Alrededor di 11’or di anochi a habri e caminda bek pa publico. Parti musical tabata den man di Duro Entertianment y DJ Sergio Barros. E anochi a keda conduci dor di srta. Aisette Rivera, host na Magic FM. Un evento manera ‘Long Table’ Aruba, no por tabata posibel sin algun patrocinador cu tambe tabata dispuesto pa un biaha mas duna nan aporte na e bunita proyecto aki.