Porfin Caya Betico Croes na Playa lo bay haya mihor iluminacion

E luznan cu Gobierno anterior a instala tabata hopi debil

ORANJESTAD (AAN): For di tempo cu e renobacion di Caya Betico Croes na Playa a keda cla y entrega den pasado, DIARIO a indica e preocupacion di hopi hende cu e arkitecto of contratista a usa palonan di luz cu casi no ta ni manda suficiente iluminacion rond di dje.  Y un tempo hasta un oficial di Polis a yega di expresa, cu e ta convenci cu e iluminacion pober den Caya Grandi ta loke a pone cu vandalismo y ladronicia a aumenta barbaramente den oranan di anochi y marduga den e area.

   Pero awor tin solucion na caminda!  Posiblemente lo bay usa e biaha aki luznan High-Intensity LED cu lo ilumina Caya Grandi mihor cu nunca.

   Ta asina cu riba Diamars 24 di october DOW a cuminza cu e proyecto instalacion di luznan nobo y adicional den Caya Betico F. Croes. E instalacion ta inclui 50 palo di luz nobo reemplazando esnan existente y cu no ta funciona debidamente.

   Minister di Asuntonan Economico, Sr. Geoffrey Wever, ta contento di mira e inicio di proyecto di iluminacion, mirando cu esaki tin basta tempo den planificacion. E mandatario a splica cu e proyecto di revitalisacion di Oranjestad ta consisti di diferente proyectonan cu hunto mester trece un impacto positivo den centro di ciudad. Pa ambos San Nicolas y Oranjestad, iluminacion y seguridad ta importante pa cual a escohe pa atende cu e reto aki inmediatamente.

   Pa atende cu e aspecto di seguridad pa haci caya Betico F. Croes mas atractivo anochi, a haci un inversion di mas di 60 mil Florin pa iluminacion.

  Fuera di iluminacion, tin otro proyectonan di infrastructura plania y tambe den ehecucion. Un ehempel di esaki ta e proyecto di Wilhelminastraat y Columbusstraat, cual pronto – finalmente – lo termina., e proyecto aki ta atende cu accesibilidad, crea mas espacio publico, facilidad di permiso pa precario, percura pa mas limpiesa y expansion di parkeo, cu tin e meta principal di drecha e atmosfera empresarial den e area.

   Minister Wever ta indica di ta na altura cu tin diferente reto pa atende cu nan den e cuadro di revitalisacion den e area, y cu esaki tin su debido atencion. Ta trahando duro cu diferente gruponan envolvi pa atende cu proyectonan realisabel a corto plaso, mientras ta preparando pa e proyectonan mas duradero y a largo plaso.

   Colaboracion entre sector priva y gobierno ta keda esencial den realisa un centro di ciudad revitalisa, cu destinacion pa haci Oranjestad un centro di gastronomia y vivienda. E mandatario ta gradici tur esnan envolvi pa nan esfuerso, y e comerciantenan pa nan pasenshi y comprension.