*Laga airco inverter cendi henter dia tin su costo!
ORANJESTAD (AAN)—DIARIO por a compronde for di diferente consumidor, cu durante e siman cu a pasa, NV Elmar a haya cantidad di hende cu a bay reclama cu nan cobranza pa uzo domestico, a bin sumamente eleva.
DIARIO mes a yama puntra tocante esaki, ya cu varios persona a keha na mesa di redaccion, y e persona cu a tuma e yamada na NV Elmar, a admiti cu tabata tin rij largo pa paga, tanto na Playa como na Noord, pero tambe pa haci reclamo, y t’a asina tambe cu hopi consumidor a haya nan cobranza un tiki menos of un tiki mas, cu e lunanan anterior, kiermen nan gasto promedio di electricidad tabata basta similar.
Pero esnan cu a mira sumanan eleva, berdaderamente, segun e funcionario, a haci uzo di coriente cu a pasa limite. Hasta a scucha comentario di cliente cu kier cambia pa meter prepago, locual ta aconsehabel pa e persona mes hiba control di su uzo di energia, pasobra cu meter regular nan mes no ta midi.
E funcionario a comenta cu masha poco biaha sa sosode cu tin un fout di e compania, y ora sosode esey, ELMAR ta remedia e situacion sin afecta e cliente.
Pues ta aconsehabel pa e consumidor mes controla su uzo di electricidad, ohala tur dia, y por ehemplo, no excede den uso di airco cu ta locual ta ocasionando e problema mas tanto.
Aunke berdad e calor ta sofocante, pero mester ta conciente cu e airco ta hala hopi coriente y si e ta cendi henter dia e cobranza ta bin halto sigur!
Hopi hende a kere cu esnan tipo inverter por keda, keto bay cendi dia tras dia, pero esaki ta puro teoria, pasobra na momento di e berdad, wak e consecuencia pa hopi consumidor cu a paga, of tin pa paga, sumanan cu a laga nan “den shock” confiando cu airconan inverter ta hopi economico y ta spaar coriente.
Tur cos cu ta di mas tin su costo cune, segun e funcionario di NV Elmar, cu amablemente a papia cu redaccion.
