“Bo ta haya tur cos alcanzabel pa bo cartera”
ORANJESTAD (AAN) – Randy Maduro, funcionario di Departamento di Agricultura, Cria y Pesca (LVV) , a anuncia den entrevista cu DIARIO e siguiente mercado Santa Rosa, Diadomingo awo, 29 di October.
Esaki en conexion cu Dia di Alimentacion cu a keda celebra dia 16 di October ultimo. Maduro a subraya cu LVV- Santa Rosa, ta felicita tur e productornan di berdura, fruta y carni y pisca fresco di Aruba, y cu ta duna nos pueblo, e parti di seguridad di alimentacion.
Tambe el a invita henter comunidad pa bishita e mercado di Santa Rosa, reiterando cu ta Diadomingo proximo 29 di October, for di 9’or di mainta te cu 2’or di atardi.
“Mercado Santa Rosa ta asina popular, pero e biaha aki ta un tiki mas hopi, pasobra nos ta contando cu mas di 40 stand di diferente producto local, cu por cumpra akinan. E ta sugeri pa bin trempan y esnan cu tambe tin un stand tambe set up, pasobra e fluho di hende ta bay ta hopi grandi.
E biaha aki tambe ta bay wordo organiza patras di nos edificio, caminda cu e ta un tiki mas fresco, mas berde, mas bunita, cu matanan frutal. Kiermen, nos ta warda boso Diadomingo awo 29 di October for di 9 or di mainta”, Randy Maduro a reitera.
Ta bay tin cuminda crioyo, platonan di pisca y un sinfin di coi dushi, jam y diferente licor, di sabor varia, traha na Aruba. “Un vez bo yega aki na Mercado di Santa Rosa, tur cos bo ta haya, alcanzabel pa bo cartera” Randy Maduro a remarca.
