PNA cu proyecto pa rescata e area di mangrove den Mangel Halto

Arumil y otro instancianan a colabora:

ORANJESTAD (AAN) – Giancarlo Nuñes, funcionario di Parke Nacional Aruba (PNA), den entrevista cu DIARIO, a duna informacion tocante un proyecto cu ta tumando lugar na Mangel Halto, pa restaura e area di mangrove cu a bay atras.

Den e ocasion aki nan ta contando cu colaboracion di Arumil, mientras cu un par di siman atras nan a cuminza cu otro organizacionnan tambe.

E problema ta debi cu e canalnan cu tabata tin den e magel pa awa por drenta, tur a seca y santo a drenta den dje y e mangelnan a cuminza bay atras.

Nuñes a splica cu e mangelnan ta un sistema hopi importante pa e bida marino y hopi biaha e pisca di lama, di reef ta bin na Mangel Halto pa broei. Aworaki Mangel Halto a perde e funcion aki y PNA ta trahando pa e area aki haya su funcion bek.

“Mangel ta un lugar unda hopi bestia chikito por bay den dje, kiermen pisca, crab, etc ., unda cu bestia grandi no por come nan. Eynan nan ta safe, nan ta crece bira un tiki mas grandi y fuerte pa cuida nan mes y despues ta bay afo bek den reef, y e piscadornan por gara e piscanan aki. Pero mangrove tin hopi otro funcion importante, manera haci awa limpi. Kiermen, si tin polucion ta bin den tera nan ta drenta mangel prome y esaki ta saca esaki for di awa prome cu drenta lama”, Nuñes a indica.

El a agrega cu mas mangel tin cu ta sano miho e calidad di awa lo ta tambe, rond di Aruba.

El a splica cu e maneho den pasado, e construccion cu tin riba tera unda erosion di santo ta drentando e sistema aki y ta yene cu santo cu ta bin di tera cu awacero, pero ademas e yerba di lama cu tabata tin den pasado, cu ta suppose di wanta e santo den e awa, no tey mas y ora e awa a subi e ta drenta den e sistema di mangel tambe.

El a indica cu e maneho cu tabata tin den pasado a zorg tambe pa den cierto area e santo tabata drenta tambe den e canalnan.

Nuñes a splica cu nan a haci un test ora nan a caba di coba, nan a laga e puntonan final cera, pero siman pasa, pa un momento corto, nan a habri e puntonan na final y a wak cu awa di lama a drenta den e sistema y areanan cu tabata seco a cuminza yena cu awa bek, pues nan sa cu e sistema aki ta traha caba y aworaki nan ta bezig cu e tokenan final pa percura pa tur caminda e awa por funciona e miho posible.