Prome Ministro a haci bishita na e Fiesta Tipico den Bario

ORANJESTAD (AAN): Diadomingo 28 di mei a tuma luga na Centro di Bario Savaneta e di tres 'Fiesta Tipico den Bario' organiza pa Fundacion Union di Tipiconan Rubiano, conoci como Fundacion UTR.

   E prome Fiesta Tipico a tuma luga na luna di maart na Centro di Bario Brazil, e di dos na luna di april na Club Sport Boys, ambos a resulta exitoso. Na juli lo tuma luga e di cuatro encuentro na Centro di Bario Lago Height.

   Prome Minister Evelyn Wever-Croes a presencia y disfruta di un ambiente sumamente agradabel na unda cu hopi ciudadano a bishita e evento tipico y a goza di un ambiente tipico Arubano. Prome Minister a representa Minister di Cultura Xiomara Maduro cu no por tabata presente.

   Manera ya ta conoci, Fiesta Tipico den Bario ta un bunita iniciativa di nos lidernan di e gruponan di Tipico di Aruba pa promove e musica tipico den nos dushi barionan di Aruba. Eventonan manera esaki ta promove pa nos biba nos cultura y contribui pa nos mantene nos folklore bibo den barionan y traspasa esaki pa e generacionnan mas hoben.

   Tambe, durante e Fiesta Tipico den Bario, Gobierno di Aruba ta duna reconocimentonan na esnan cu ta sostene, promove y mantene nos folklore bibo den nos barionan. E biaha aki a reconoce señora Mathilde Paskel-Boekhoudt y señor Esteban Banchi Koolman.

   Den nomber di Minister Xiomara Maduro y di Gobierno di Aruba, Prome Minister ta gradici UNOCA pa pone fondonan disponibel pa yuda cubri gastonan di e bunita fiesta tipico cultural aki. Tambe Prome Minister ta gradici y felicita Fundacion UTR pa oraganisa e evento bunita aki cu tabata exitoso un biaha mas. “Cultura bo tin cu bib’e. Y nos mester di pioneronan y motornan tras di organizacion aki pa asina percura cu cultura y musica tradicional ta keda biba den nos comunidad”, Prome Minister a expresa.

   Prome Minister ta extende un invitacion, for di awo caba, na cada ciudadano pa e siguiente Fiesta Tipico den Bario, dia 2 di juli na Centro di Bario Lago Height.