ORANJESTAD (AAN): E cadena di Fox News a divulga siman pasa, cu e asesino condena Joran van der Sloot,
kende ta e sospechoso principal di desaparicion na 2005 di Natalee Holloway, aparentemente tin “hopi fanatico” rond mundo cu ta mande un promedio di $400 pa luna. Esey ta loke su abogado na Peru a divulga.
Joran van der Sloot awor ta bay wordo extradita e luna venidero pa Merca, unda e tin di bay responde riba acusacion di fraude electronico y extorsion despues cu supuestamente el a trata di bende Beth Holloway (mama di Natalee) informacion riba unda e curpa di e yiu muher ta. Na comienzo di Mei, e gobierno di Peru a indica cu e lo wordo extradita temporalmente pa pasa den e proceso di Corte aki na Merca.
Segun Husticia Mericano, Joran van der Sloot a pidi $250.000 (di cual $25.000 ta na man) pa informacion y e resto ta wordo paga completamente ora cu e curpa di Natalee Holloway wordo identifica positivamente.
Su abogado na Peru, esta Maximo Altez, a bisa Fox News cu Joran van der Sloot tin fanaticonan rond mundo, kendenan ta mand’e placa tur luna mientras e ta encarcela den prison. Segun abogado Altez, Joran ta responde tur e cartanan cu muhernan ta manda pe.
“Su fanaticonan for di rond mundo ta manda carta pa Joran. Mi a huur un P.O. Box pa ricibi nan. Algun carta ta bin cu 10 Euro, 20 Euro, 5 Dollar. Ta mucha muhernan cu ta skirbi y mande carta conteniendo placa, y e ta contesta nan tur,” abogado Altez a bisa.
Segun e abogado, Joran van der Sloot cu e cartanan aki so ta ricibi como $400 pa luna. E cartanan aki no ta wordo entrega na prison, sino na un P.O. Box.
Joran mes ta cera den prison na Peru, pa e asesinato di Stephany Flores di 21 aña na 2010. Su castigo original tabata 28 aña, pero el a haya mas aña acerca debi na un escandalo di contrabando di droga den prison.
