Plaquette di un palo historico presenta na crusero Carnival Venezia

ORANJESTAD (AAN): Siman pasa e barco crusero Carnival Venezia a haci su prome bishita na Aruba.

  E barco aki a wordo lanza na Juni 2018, y originalmente tabata destina pa sirbi mercado Chines.  El a cuminza cu viahenan crusero como ‘Costa Venezia’ pa e compania Costa Cruises na Shanghai na luna di Mei 2019.

   E barco aki tin largura di 324 meter, y por transporta 4.200 pasahero.  E capacidad maximo di dje ta 5.260 pasahero, y a costa 780 miyon Dollar pa construi.  E interior ta hopi luhoso mes.

   Awor na 2023, e barco aki ta nabegando bao di e nomber di Carnival Venezia, y e ta nabegando awor saliendo di e.o. New York, of tambe Port Canaveral, pa viahenan di 5 dia, di 9 dia, of tambe di 10 of mas dia pa bishita Bahamas, Bermuda, Canada, New England, Caribe, y Canal di Panama.

   Tabata Diabierna 29 di September 2023 cu e barco a sali for di New York rumbo pa Caribe.  Dialuna dia 2 di October el a bishita Turks and Caicos.  Diaranson 4 di October el a bishita Aruba for di 9’or di mainta te cu 10’or di anochi.

   Relaciona cu e bishita aki, e CEO di Aruba Ports Authority NV, esta Marc Figaroa a entrega un plaquette special na capitan Crescenzo Palomba.

   E plaquette aki a wordo traha di palo cu a yega di worde usa pa e kade den Waf di Playa.  E ta data di mas di 40 aña pasa y ta forma parti di e historia di Waf di Playa.

   E palo a wordo corta cuidadosamente, a polish esaki y a graba y trahe den un plaquette special y unico, cu Aruba Ports Authority NV tabata orguyoso di present’e den cuadro di e ceremonia di prome bishita di e barco aki.

   E barco despues a sali pa bishita Curaçao, Barbados, St. Lucia, St. Maarten, St Thomas, y riba Diasabra 14 di October e lo ta regresando bek New York despues di e viahe di 15 dia caba den zuid di Caribe.