Autoridad a descubri refineria clandestino produciendo gasolin na estado Falcon

CORO: Un team special di Polis di Cicpc di municipio di Dabajuro, a descubri Diahuebs pasa varios deposito unda nan tabata procesa y rafina gasolin di forma clandestino,

y tabata bende esaki na municipio Mauroa di estado Falcon, como tambe den wafnan di Altagracia, den estado Zulia.

   E team di Polis tabata haciendo investigacion riba terenonan di mondi na altura di kilometer 52 den zona di Mene de Mauroa, ora cu diripiente un motorcycle cu a sali di un hanchi scondi, y ora el a mira Polis el a core huy lagando un jerrycan cu gasolin y un smartphone cu informacion importante cu a trece tur detaye con un ciudadano ta envolvi den un structura cu ta dedica na produccion y benta clandestino di gasolin, cual actividad na Venezuela legalmente tin di wordo haci door di companianan estatal solamente.

   Di e forma ey, autoridadnan a start cu un accion di buskeda den e sector cu ta keda como 60 km leu pariba di e Brug di Maracaibo, y di e forma ey e oficialnan di Cicpc a bin descubri den un zona di mondi, un mini-instalacion completo di un refineria cu ta funciona pa produci combustible, y banda di dje un deposito yena cu cantidad di bari cu gasolin den dje.

   Siguiendo cu e investigacion, y a base di e datonan completo cu nan a haya den e smartphone, Polisnan a bay na un cas na sector Campo Piñita, unda nan a detene e muher Elaina Alejandra Yanez Alvarez di 39 aña di edad, conoci como ‘La Chachi’.

   Den e smartphone confisca, nan tin monton di voicenote cu ta elabora extensivamente riba e negoshi ilegal y e cadena di distribui y bende e gasolin cu a wordo produci clandestinamente, den cual ‘La Chachi’ ta envolvi.  Na su cas a bin haya 14 bari cu total di 980 liter di gasolin, y seis bari mas cu tabata bashi.

   E investigacion preliminar a mustra cu e gasolin ta wordo haya di e refinamento ilegal y rudimentario usando crudo cu nan ta haya di diferente pos di petroleo den e zona.  For di eynan, pasando via varios hanchi, e producto ta wordo distribui pa mercado preto den e area, principalmente na Waf di Altagracia na estado Zulia.

   Ademas di e barinan cu gasolin, e smartphone valioso laga atras pa e motociclista, y un smartphone mas, Polisnan di Cicpc a confisca un destilador artesanal.  Nan a saca potret y graba video di tur cos, pa asina Ministerio Publico por exigi castigo halto pa cu e fabricamento ilegal di gasolin, contrabando, y uso ilegal di crudo cu ta pertenece na estado Venezolano.

   E gasolin cu a wordo confisca aparentemente ta uno di masha mal calidad mes, cu octano hopi abao, y pa colmo e lo ta yena cu contaminante den dje.