Piscadonan di Aruba yudando parhanan herida tambe

ORANJESTAD (AAN): Recientemente, e conocido piscado y alavez president di Fundacion Centro di Pesca Hadicurari,

esta Arthur ‘Tuy’ Giel a topa cu un rogans (pelican na ingles) herida.

   Mirando esaki, e no por laga e animal herida keda sufri.  Pesey señor Giel a usa tactica, y na un forma suave y sin mucho peligro, a captura pa asina rescata e rogans.

   El a pone e rogans den un caha cu a wordo bon tapa, y solamente su cabez a sali for di e caha pa asina e no haya stress.  Tambe señor Giel a bay busca un paki di piskechi, y a pone esaki den un cooler.  Tanto e cooler y e caha di rogans a wordo poni riba un garoshi, pa asina e hibe pa su vehiculo.

   Señor Giel a entrega e rogans hunto cu e piskechi na conocido veterinario, dr. Gogorza pa asina mira si por rehabilita esaki.  E veterinario a indica cu e lo bay traha riba dje mesora pa yuda e pober animal aki.

   Kizas pueblo no sa, pero tur e temponan aki na diferente ocasion, ta varios diferente parha e piscadonan di Aruba sa yuda rescata. Esaki ta enfatisa un biaha mas, cu ta bon pa mantene bon contacto cu piscadonan cu ta regularmente riba lama.

   DIARIO kier a gradici Tuy Giel pa e fenomenal trabao cu el a haci aki.  Job well done!