Apenas 1 ora cu a start cu su trabao den Caribe
ORANJESTAD (AAN): Esaki si ta un record! Durante apenas e prome ora di operacion, a bira den un hit instantaneo pa e barco di Marina Hulandes, esta Zr.Ms. Friesland. Na parti zuid di islanan ABC e barco di Marina a intercepta un speedboat tipo Go-fast y den esey a confisca 3.000 kilo di droga.
Tabata e avion di patruyahe Dash-8 di Wardacosta di Caribe Hulandes 29 di Mei a descubri un boto chikito sospechoso den Lama Karibe. Zr.Ms. Friesland a tuma rumbo pa e boto y directamente a lansa dos FRISC-botonan di intercepcion rapido. A sigui cu un persecusion durante cua e contrabandistanan a cuminsa tira e droganan den laman, pero nan ta keda drief. Mas cu 100 bulto grandi di droga a keda saca for di den laman; un total di 1.837 kilo cocaina y 1.173 kilo di marihuana. E droga cu a confisca a keda entrega na US Coast Guard.
Comandante di Zr.Ms. Friesland, Kirsten Gouw-Savelberg, ta enfatisa e importancia di despliegue rapido y colaboracion internacional: “E intercepcion exitoso aki ta demostra di kico un ekipo bon entrena y integra ta capaz. Nos ta cla pa loke ta bay bini.”
Zr.Ms. Friesland dos siman pasa, dia 23 di Mei, a yega den Region Karibe y for di e dia ey e ta e barco staciona den Region Caribe pa Defensa. Ehecucion di operacionnan anti droga ta un di su tareanan. Den esaki e barco ta traha intercambiando hunto cu US Coast Guard y Wardacosta di Caribe Hulandes. Ademas di esey, e barco ta para cla pa brinda yudansa humanitario, por ehempel na momento di desasternan natural, tal manera un horcan.
