Personal di Biblioteca Nacional Aruba a celebra 'Dia di Biblioteca'

Durante un dia di reflexion:

ORANJESTAD (AAN):   Diabierna mainta personal di Biblioteca Nacional Aruba a tene un bunita actividad den cuadro di e di 31 edicion di Dia di Biblioteca cu a ser celebra recientemente. Mirando cu e dia aki a cay den siman y cu tabata siman di examen, a tene cuenta cu biblioteca tabata basta druk yen di mucha cu a haci uzo di e localidad pa bay studia.

            Pero diabierna, e personal a bay hunto na Surfside Marina pa un encuentro inspirado caminda tur empleado por a reflexiona riba e rol importante di un biblioteca den comunidad y principalmente riba e aporte invaluabel di esnan cu ta haci e trabao aki posibel, esta e bibliotecarionan.

            Astrid Britten, Directora di BNA a habri e mainta cu un reflexion y despues a sigui cu un programa yen di actividad manera un discurso motivacional bao encargo di Sra. Michelle Brooks, un actividad cu Aruba Certification Program, hersengymnastiek, entre otro,  te den oranan di atardi caminda e empleadonan por a comparti cu otro y pasa un dia hopi ameno.

            Ta importante pa menciona cu na biblioteca ta crea un espacio caminda hende ta sinti nan mes sosteni y inspira.

            Como lider di BNA, Sra. Britten a expresa cu biblioteca ta un luga cu ta contribui na e desaroyo personal di cada hende y cu ta un neishi di informacion. Esaki e no ta hacie su so, a bisa. "Como team nos tin e responsabilidad y nos tin un rol importante den e mundo di informacion, coleccion y creatividad. E trabao cu nos ta haci ta esencial".

            No solamente a celebra trabao di biblioteca. Ta celebra conocemento y tambe ta celebra cu ta eherce e trabao cu pasion y dedicacion, el a agrega.

            Durante e dia aki, tambe a celebra 45 aña di servicio di Sra. Michelle Roos cu a cuminsa traha na aña 1980 den e departamento di Catalogo. El a haya un reconocimento pa su añanan di servicio y un excelente labor.

            Masha pabien BNA!