Buki nobo ‘IDOOR and others: Aruba’s Aviation History 1923-1950’

Experto Mauricio Boekhoudt di aviacion...

ORANJESTAD (AAN): Un multitud di invitado y interesado tabata presente Diahuebs anochi trempan na Biblioteca Nacional Aruba den George Madurostraat, pa presencia e momento cu Mauricio Boekhoudt, IAP, ta lansa su buki nobo.

   Nomber di e buki cu a wordo presenta ta: “IDOOR and others: Aruba’s Aviation History 1923-1950”

    Mauricio Boekhoudt ta un persona cu un trayectoria impresionante den aviacion aki na Aruba.  Tur hende cu tabata pasa den area di Aeropuero, tabata mire eynan.  Sea durante conferencia di prensa, of ora cu tin actividadnan importante na Aeropuerto.

    En general, Mauricio ta un persona cu mas di 45 aña di experiencia den aviacion.  DIARIO a compronde cu Mauricio a cuminsa na vliegveld como controlador di trafico aereo na Aeropuerto di Aruba y a termina su carera profesional como consehero strategico na Aruba Airport Authority NV.

   For di comienso di Mauricio su carera den aviacion el a ripara cu no tin hopi conocemento pa cu historia di aviacion di Aruba. Esaki a pone Mauricio mes cuminza pa cuminsa un investigacion, y esaki a bira uno profundo.

   Resultado di dicho investigacion a haci posibel publicacion di e buki aki, cu ta contene un historia extenso y rico di e aviacion di Aruba di 1923 pa 1950, cu e epoca ey tabata domina pa e servicionan experimental di KLM na ‘Dutch West Indies’.

   Na cuminsamento tabata uza un parti duro di e beach na costa zuid di Savaneta como pista di aterizahe y subida di e avionnan. Sinembargo, despues di tempo a urgi gobierno pa construi un aeropuerto na parti west di Oranjestad.

   E prome servicionan organiza entre Curaçao y Aruba a cuminsa 19 di januari 1935. Aruba a bira un hub pa KLM na ‘West-Indies’, mientras cu aviacion comercial na Aruba a progresa rapidamente.

   Na 1939 Aruba tabatin conexion aereo cu Trinidad, Barbados, Maracaibo, Barranquilla, Bonaire, Coro y La Guaira. E mesun aña Aruba tabatin conexion aereo cu Pan American Airways cu ruta transatlantico cu Amsterdam via Port Washington na Long Island, New York. Y di aki ta continua pa Lisboa y Marseille atrabes di Horta, Azores. Entre 1944 y 1948 Aruba tabatin conexion aereo directo cu Port-au-Prince (Haiti), Camaguey (Cuba) y Miami (USA).

Riba 4 di juni 1942 a inaugura e di dos terminal di aeropuerto ‘Dakota’ na Aruba.

   Pues e buki aki ta trata parti di herencia y desaroyo di historia di aviacion na Aruba di 1923 pa 1950.

   E anochi aki, Mauricio a entrega ehemplar di su buki na Prome Ministro Evelyn Wever-Croes, tambe na Ministro Ursell Arends, y a haci esey tambe cu Jurgen Benschop di AAA NV, tambe consehero di transporte aereo, Agustin Vrolijk a ricibi un ehemplar, y Astrid Britten na nomber di Biblioteca Nacional.

   Un palabra di pabien na Mauricio Boekhoudt, IPA, cu e bunita buki aki cu ta un contribucion inmenso na historia di Aruba.