E crusero Majestic Princess a haci su prome bishita pa Aruba

ORANJESTAD (AAN): Aruba Tourism Authority (A.T.A.) y Aruba Ports Authority (APA), hunto cu Port Agency Armada,

orguyosamente a yama bonbini na Majestic Princess di Princess Cruises durante su prome bishita pa Aruba. E bishita significativo aki ta reforsa e nivel continuo di Aruba como un destinacion preferi pa  turismo crucero di luho den Caribe.

   Durante un ceremonia abordo, representantenan di A.T.A., APA, y Port Agency Armada a cumpli cu e parti tradicional di intercambio di plakaat. Un costumber maritimo cu ta simbolisa bon intencion y ta conmemora e prome bishita di un barco na porta di un waf. Capitan Giuseppe Castellano di Majestic Princess a ricibi un plakaat como simbolo di e hospitalidad caluroso cu Aruba tin pa ofrece. A cambio, representantenan di Aruba tambe a ricibi un plakaat for di e capitan di e barco crucero.

   E crusero Majestic Princess por transporta 3.560 pasahero, y e tin total di 1.346 miembro di tripulacion.  E ta 330 meter largo, y ta 68 meter halto.  E tin total di 1.780 cabina pa pasahero.

   Majestic Princess, lansa den maart 2017, ta un obra mahestral di ingeneria moderno y luhoso. E barco a worde bautisa na Shanghai durante un ceremonia pa leyenda di basketball mundial Yao Ming y su esposa Ye Li, un ex-hungador profesional. Nan participacion ta representa elegancia internacional y respet cultural, den linea cu e vision global di Princess Cruises. Nomber Chines di e barco ta 盛世公主号 (Shèng Shì Gōng Zhǔ Hào).

   Como un parti di Carnival Corporation, Princess Cruises ta compromente cu sostenibilidad den e industria crucero. Majestic Princess ta utilisa sistema avansa pa maneho di desperdicio, tecnologia energetico-eficiente, y iniciativanan pa reducí plastico di un solo uzo. E esfuersonan aki ta den harmonía cu e compromiso di Aruba pa proteha medio-ambiente y promove turismo sostenibel.

   Capitan Castellano y su tripulante a expresa gratitud pa e recepcion caluroso di Aruba, destacando e bunitesa natural y e ambiente amicabel di e isla. Huespednan abordo di Majestic Princess a disfuta di e oportunidad pa descubri e playanan bunita di Aruba, cultura vibrante, variedad gastronomico, y diferente actividad atractivo.

   A.T.A. y A.P.A. ta gradici capitan Giuseppe Castellano y e ekipo completo di Majestic Princess pa scoge Aruba como destinacion. Ta di menciona cu Princess Cruises ya pa durante hopi aña ta contribui na e sector turistico vibrante di e isla. Ta di spera cu Princess Cruises y su flota magnifico lo continua cu nan bishitanan memorabel pa Aruba.