Persecusion intenso riba lama a finaliza cu captura di 3 ton di cocaina

Barco Zr.Ms. Groningen a usa tactica riba lama

ORANJESTAD (AAN): Zr.Ms. Groningen apenas recien a regresa e area aki procedente di Hulanda.  Ya durante e prome siman di patruya den Region di Caribe, a realisa un captura enorme di droga.

   A sali na cla, cu e barco di Marina despues di un persecusion intenso, cu a socede riba Diadomingo 2 di Februari 2025, nan a logra intercepta por lo menos 3.000 kilo di cocaina den Laman Caribe.

   Durante e persecusion, a usa un francotirado pa los bala riba un motor di e boto transportando droga. E motor a keda destrui pa medio di tiro.  Na final, 5 contrabandista a keda deteni.  Esey a keda anuncia riba Diamars.

   Algo notabel, ta cu un dia prome cu e captura Wardacosta di Caribe Hulandes a mira un boto sospechoso riba radar di costa. Zr.Ms. Groningen hunto cu e avion patruyero di Wardacosta a drenta accion y a nabega rumbo pa e boto.  Despues di un persecusion den anochi/marduga, e boto sin embargo a logra huy.

   Pero esaki no a desanima esnan abordo di Zr.Ms. Groningen, pues no a entrega y a escohe pa tuma un posicion tactico y cu exito.

   E siguiente mainta e boto a aparece riba radar di e barco di Marina.  Riba esey a desplega e helicopter NH90 di e barco di Marina hunto cu e botonan rapido di intercepcion, esta FRISC.

   Nan tampoco no a logra stop e contrabandistanan cu a ocasiona basta trabao.  E contrabandistanan a ignora señalnan pa stop, y no a worry cu e tironan di advertencia tira for di e FRISC.  Finalmente e NH90 a logra stop e boto cu tironan dirigi cu a pone e motornan stop di funciona.  E boto tabata conta cu 4 outboard engine potente.  Abordo tabatin tambe como 15 bari yena cu combustibel.

   E ora si tur cinco contrabandista a pone ‘hands-up’ pa entrega nan mes.  nmobil.  Abordo ademas di e 5 contrabandistanan tabatin como 94 pakete di cocaina, cu a yega na un total di 2.820 kilo. E sospechosonan y e droga a keda entrega na US Coast Guard.

    E barku patruyero Zr.Ms. Groningen for di fin di Januari ta e barcu staciona den Region Caribe.  E barco di Marina ta funciona durante operacionnan anti droga intercambiando hunto cu US Coast Guard y Wardacosta di Caribe Hulandes.