Patruyero Zr.Ms. Holland ta regresa Caribe e siman aki cla pa sigui den bataya anti-droga

ORANJESTAD (AAN): E barco di Patruya Zr. Ms. Holland ta yega bek Caribe e siman aki.  Awe Diaranson e lo ta yegando Curaçao.

   Cu esaki Region Caribe tin atrobe un barco di Patruya operacional na su disposicion. Cu un saludo desde Fort Krommelijn e barco ta worde treci paden ceremonialmente pa Comandante di Forzanan Naval den Region Caribe.

   DIARIO a compronde cu e barco lo bay drenta tambe despues na Aruba y na St. Maarten unda lo ricibie segun e tradicional ceremonia.

   A ser splica, cu e patruyero Zr.Ms. Holland lo permanece den Region Caribe minimalmente pa 6 luna.

   E lunanan benidero e barco lo patruya intensivamente riba Laman Caribe. Eynan entre otro e ta keda desplega pa operacionnan anti-droga, mantencion di orden contra contrabanda di arma y traficacion di hende. Pero tambe eventualmmente pa yudansa di emergensia durante horcan, paden y pafo di Reino.

   E barco lo nabega tambe pa Guardacosta di Caribe Hulandes, y lo envolvi su mes cu mantenshon di reglanan di medio ambiente, por ehempel si tin di haber cu piscamento (ilegal).

   E barcu patruyero nobo ta un “Oceangoing Patrol Vessel”, pues barco patruyero pa lama grandi, di Klase Hulandes.

   Zr.Ms. Holland na cuminzamentu di 2018 tabata pa ultimo biaha activo como barcu patruyero den Region Caribe. E barco tin tambe un helicopter di combate maritimo NH90 abordo, cual eventualmente, hunto cu e barco patruyero, por eherce operacionnan di buskeda y rescate.

   Cu e presensia di e barcu patruyero forzanan arma ta cumpli cu nan tareanan constitucional, por ehempel mantencion di orden huridico internacional. E anterior barco patruyero, Zr.Ms. Groningen, a sa di marca pouta di captura di droga cinco biaha den apenas 1 luna.