Casnan di proyecto Kiviti di FCCA a wordo entrega oficialmente

ORANJESTAD (AAN): Diamars atardi a tuma lugar entrega di casnan di e proyecto Kiviti di FCCA na Palesiaweg na San Nicolas.

E prome fase di e proyecto aki ta consisti di 71 cas y a wordo ehecuta pa e companianan Story Brook Properties N.V, Quick Electrical Services N.V y CVC Construction & Management.

Director tecnico y comercial di FCCA Julie Wever a hiba palabra durante un conferencia di prensa.

E director nobo a bisa cu e ta sinti su mes orguyoso cu e proyecto aki y el a gradici su antecesor Edwin Tromp y henter e team di FCCA, como tambe tur e contratistanan pa e tremendo trabao.

“E proyectonan aki ta wordo traha cu hopi dedicacion y pensamento”.

E casnan ta cu isolacion cu awendia ta yudabo spaar energia.

No ta sin mas nos ta djis yega construi un cas, sino e casnan aki ta wordo traha cu e pensamento riba con nos por duna mas calidad na nos clientenan, segun Wever.

El a sigui bisa cu e terenonan a wordo haya den un convenio cu Gobierno, unda cu e intencion ta pa mas mihor posibel baha e gastonan pa hendenan por yega na nan hogar.

“E tereno di 60.000 meter cuadra a wordo facilita pa un proyecto di 71 cas cu a ocupa alrededor di 22.000 meter cuadra”, segun Wever.

El a splica cu pa FCCA ta importante pa e casnan ta mas cu solamente cas, sino hogarnan.

Diamars un di e casnan a wordo entrega simbolicamente na Trina Irausquin, kende lo bay biba den dje hunto cu su yiu homber di 18 aña.

Tabata Prome Minister Evelyn Wever Croes kende a entrega e yabi na señora Irausquin.