Rotaract Club cu seminario fin di luna cu invitado special Jandino Asporaat

Rotaract Club cu seminario fin di luna cu invitado special Jandino Asporaat

ORANJESTAD (AAN): E siman aki DIARIO a haya sa, cu Rotaract Club of Aruba ta organizando dia 30 di mei venidero e di 7 edicion di You Inc. Seminar,

e aña aki pa prome biaha virtual, na Papiamento y completamente gratis.

   Manera semper You Inc. Seminar kier brinda desaroyo profesional y tambe personal na cada un individuo den nan bida diario.

   E tema di e seminario lo ta “Reinventa Bo Mes”.  Cu e pandemia actual a bin hopi cambio nan den nos bida cosnan cu a pasa cu a afecta nos trabao, nos manera di comunica, nos bida social y profesional.

   Esaki a trece inseguridad y duda pa mayoria hende personalmente y/of profesionalmente. Hopi no tabata prepara pa por a deal cu e situacion actual. Cu e seminario aki You Inc. kier brinda idea nan, tips y tricks, pa sobresali inspira y motiva bo persona pa sigui pa dilanti of encurasha pa tuma e stap pa un comienso nobo y alaves reinventa bo mes.

   You Inc. Seminar 2021 lo consisti di 3 panelista y como invitado special Jandino Asporaat. E mainta aki lo tin como hosts y moderador Larissa Bermudez y miembro di Rotaract Club of Aruba: Jair Vesprey.

   E panelista nan lo ta:

   Rocío Burgos, kende ta un Branding Specialist. Rocío lo elabora ariba business y personal branding. Haya sa poco "tips and tricks" con pa brand bo mes y/of bo compania.

   Johnny Boekhoudt, kende ta sicologo forensico. Johnny lo bay elabora ariba salud mental. Un tema sumamente importante, mirando con nos bida diario a worde afecta door di e pandemia actual.

   Herrick Henriquez kende ta Director di Aruba Trade & Industry Association (ATIA). Herrick lo elabora ariba finanzas y tambe entrepreneurship door di su aña nan di experencia den e area nan aki riba diferente nivel.

   Nan lo tin como invitado special e aña aki Jandino Asporaat, naci na Curaçao, bibando na Hulanda.

   Jandino ta conoci den nos comunidad como un comediante, cu su rolnan sumamente popular como Judeska, Gerrie y Koffie, caminda e'la sa di destaca y crea un nomber pa su mes den Reino Hulandes. Loke mayoria no sa ta cu Jandino tambe a converti su mes exitosamente como un entrepreneur den area nan di television, pelicula, skirbi buki, tienda di panja y un negoshi di produci programma pa television y pelicula.

   Jandino como invitado special lo bay elabora con e'la reinventa su mes ariba e caminda pa exito y tambe e lo conta con un di su soño nan ta di uni e isla nan den Caribe pa colabora mas intensivo. Su trayectorio di Succes ta uno di aspira y admira.

  Pues mark’e den bo kalender, 30 di mei 10’or di mainta te pa 12’or di merdia LIVE y completamente GRATIS via Facebook page di Rotaract Club of Aruba y na canal di TeleAruba. Haya sa mas over di e topico nan interesante cu lo worde presenta durante e seminario e aña aki.