Patonan cu ta habita area di Bubali Plas ta na peliger

Yamado na instancianan concerni --- ORANJESTAD (AAN):   Den comunidad ta existi un preocupacion pa un situacion cu ta presentando na Bubali Plas.

Manera ta conoci, banda di Riu Hotel, tin un grupo di patonan, cu por mira nan practicamente cant'i caminda tur dia.

E patonan aki, esey ta nan habitat. Eynan nan ta biba, eynan nan ta drumi. Pero parce cu aworaki e vegetacion a bira asina hopi den nan lagoen chikito cu esaki ta treciendo cu ne peliger pa e patonan.

Segun reaccion, e area aki no ta 'safe' mas pa e avenan ya cu algun di nan ta wordo gedal pa autonan cu ta pasa eybanda sin tende cuidao cu nan presencia.

Lo ta na su lugar, pa esnan encarga cu e area, ya sea DOW, Aruba Birdlife Conservation of algun otro instancia duna un man pa wak kico por haci den e caso aki.

Na Bubali Plas tin yen sorto di pahra cu ta wordo proteha y sigur e patonan aki mester di seguridad.

Potret ilustrativo, cortesia di Facebook Page: Aruba Birdlife Conservation.