Minister Glenbert Croes a confirma acuerdo entre WEB Aruba NV y Eagle LNG pa loke ta trata suministro di gas

Noticia di DIARIO confirma! --- * Proyecto ta nifica basicamente pone fin na uso di 'heavy fuel oil'

ORANJESTAD (AAN)- Diamars atardi, Minister Glenbert Croes, titular di Labor, Energia y Integracion, a yama un  conferencia di prensa, den cual el a trata e proyecto di Eagle LNG y su actual trayecto.

            E mandatario a inicia bisando cu despues di un caminda largo, cu a cuminza casi diez aña pasa, pero ta durante e prome periodo di Gabinete Wever-Croes, cu a tuma lugar un “Letter of request for interest”, pa henter e industria di e refineria y otro industrianan alternativo, y den henter e proceso di evaluacion y seleccion, di un candidato pa e refineria, pa cual a nombra un Comision, Eagle LNG a wordo selecciona como e compania pa gobierno continua cune, e negociacion pa loke ta trata e introduccion di un proyecto di LNG pa Aruba.

            Minister Glenbert Croes ta considera e proyecto aki di vital importancia pa Aruba y gobierno ta sumamente contento, cu despues di e caminda largo cu nos pais a pasa aden, finalmente por anuncia na comunidad, cu tin un acuerdo entre WEB Aruba NV y Eagle LNG, pa loke ta trata e suministro di gas.

            Esaki ta un proyecto den cual Eagle LNG ta bay inverti un suma cuantioso estima na alrededor di 110 miyon dollar, kiermen rond di 200 miyon florin. Nan ta inverti den WEB, den infrastructura pa por ricibi e LNG aki, pa wordo suministra na WEB despues.

            E titular a reitera cu e proyecto aki ta di vital importancia pa Aruba, y a bisa cu obviamente lo tin un acto ceremonial pa e firma Diahuebs awo, pero pa WEB Aruba NV e proyecto aki ta nifica, basicamente, pone un fin na loke ta uso “heavy fuel oil”.

            Croes a subraya cu ora di papia di proteha Aruba su medio ambiente, di estabiliza tarifa di awa y coriente pa nos comunidad, y di yuda WEB opera cu formulanan mas limpi y eficiente,  esaki lo yuda e compania enormemente den gastonan di mantencion door cu nan ta trahando cu energia mas limpi. El a reitera cu LNG ta di vital importancia, pero no solamente pa WEB Aruba NV sino tambe pa Refineria di Aruba (RDA).

            El a agrega cu na momento cu WEB Aruba NV yega na un acuerdo cu Eagle LNG, e ora ey tambe pa e tereno di RdA e compania aki lo drenta den negociacion cu Eagle LNG pa loke ta regarda e infrastructura cu ta bay bin eynan.

            E mandatario a señala cu e relacion entre RDA y Eagle LNG ta bon pa WEB Aruba NV, pero tambe RdA NV y pa henter comunidad.