Hende y economia a bira adicto na petroleo y su productonan deriva --- Ni pandemia ni clima a stop e exploracion y crecemento petrolero
ORANJESTAD (AAN)- Futuro di mundo te na momento cu Covid-19 a presenta, a wordo cubri cu nubianan di fantasia di soñadornan?
Esaki ta uno di e preguntanan cu ta wordo lansa mas y mas na final di 2021, cu lo habri porta pa un futuro di incertidumbre.
E seguridad mas grandi cu hende na entrada di 2022 ta e realidad cu cambionan grandi ta na caminda mescos cu retonan cu ta spera.
DIARIO, manera ta costumber ora cambio di aña ta acerca, ta studia pronosticonan mundial y local pa futuro cercano.
Calidad di bida di hende ta e punto central ora ta midi progreso mundial pero ta riba tereno di calidad di bida tambe, preguntanan mas serio ta wordo lansa.
Calidad di bida ta depende riba factornan contradictorio, cu sigur ta bini dilanti ora atende cu e reto mas grandi cu futuro ta encera segun inventario di asuntonan cu mester di accion for di 2022.
Ta hustamente e factornan contradictorio den establecemento di calidad di bida, a haci 2021 uno di e añanan mas interesante den historia pero tambe porta pa un temporada di decisionnan serio cu mundo mester tuma.
Segun e plannan di Nacionnan Uni na 2030, hende mester conoce un mihor bida riba planeta tera, cu ainda mester ta habitabel pa hende.
Con trankil hende lo biba na 2030, cu temperatura cu ta sigui subi, ta un pregunta serio cu sigur a wordo lansa na e Conferencia di Clima, caminda un futuro di horor a wordo pinta si no bini cambio.
Petroleo ta hunga un parti importante den e cuadro di horor pa futuro pero petroleo ta motibo di otro aspecto di calidad di bida, ya cu e ta crea trabou y asina miho condicion material di bida pa hende y comunidad.
DIARIO a atende e situacion mundial y e retonan pa cual mester prepara Aruba, cu expertonan local y contactonan internacional cu a mustra riba e dificultad grandi pa hende deshaci di petroleo.
“ Hende ta adicto na petroleo. Economia mundial ta adicto na petroleo,” expertonan a trece dilanti.
Mescos cu turismo, petroleo ta soluciona problemanan financiero, economico y social na forma eficaz den un tempo relativamente corto.
Esaki ta haci cu na paisnan cu ta depende di petroleo, habitantenan tambe tin dificultad pa despedi di sector petrolero cu ademas ta produci cantidad di producto cu a bira normal den bida diario.
“E cantidad di productonan deriva di petroleo no ta solamente azeta pa motor, pero tambe e mat den cas. Plastic cu a reemplasa glas. Salida di e epoca di petroleo ta mucho mas dificil cu ta pensa,” a bini dilanti.
Como ehempel a trece e hecho cu na 2021 industria petrolero a sigui crece den region di Aruba tambe.
Surinam for di Januari 2021 ta wordo menciona como un posibel pais productor petrolero grandi, caminda cantidad di compania ta explora presencia di petroleo den lama.
Exploracion ta continua na Guyana y Trinidad ta haya mas reconocemento.
Mundo a compromete su mes na cambio di clima y awe ta na careda pa por cumpli. Mientrastanto e demanda pa gas y petroleo a subi cu temporada friu na un parti di mundo cu mester baha temperatura paden y temporada di calor na otro parti di mundo cu mester di airconditioning.
E efectonan economico di petroleo y tur su productonan, mester wordo reemplasa, a wordo splica.
Mientras hende ta busca un solucion, industria petrolero ta sigui crece na 2022 cu companianan petrolero grandi buscando formula pa e producto bira mas “limpi”.
Bida na mundo y na Aruba lo depende di resultadonan di desaroyonan actual na 2022 ora inflacion como resultado directo di un economia mundial turbulento, lo bati na porta.
DIARIO lo sigui informa mientras prueba a wordo duna cu ni pandemia ni clima a stop e crecemento di sector petrolero mundial, manera cifranan ta confirma.
