Paseo Herencia ta continua cu su programa ‘Gift of Education 2021/2022’

ORANJESTAD (AAN) Durante un conferencia di prensa convoca na TGI Friday’s, gerencia di Paseo Herencia

a duna un bon noticia pa demostra loke nan ta conoci pe, esta di pone hopi enfoque riba locual ta cultura di Aruba y na mes momento apoya nos atletanan y artistanan local.

   Valerie Pietersz-Camacho (gerente general) y tambe Zaira Orman-Maya (gerente di mercadeo) a splica cu desde 2015 Paseo Herencia a inicia su programa di Gift of Education cu e meta pa yuda paga e gastonan di estudio di e muchanan asina aportando na educacion di nos hobennan brindando oportunidad pa logra nan meta di un educacion avansa no obstante nan situacion financiero.

   Paseo Herencia ta kere firme den un bon educacion y ta keda para tras di e hecho cu asina cu bo tin un educacion ningun hende por kita esaki di bo y soñonan por worde alcansa. Ademas, un persona bon educa por contribui na e progreso di su pais. 

   Un di e rekisito di e programa ta cu tanten cu e muchanan keda bay bon na scol nan lo keda haya e sosten di Paseo Herencia den e parti financiero pa nan por sigui studia na Aruba.

   Diaranson atardi pa clausura di vakantie Paseo Herencia a invita e famia nan pa un dushi treat di TGI Friday’s na Paseo Herencia. E muchanan a haya un shopping bag cu contribucionan di Maggy’s, Starbucks, Vadavas, Beach N Flips y the Athlete’s Foot. E studiantenan a worde invita tambe pa pasa Caribbean Cinemas pa mira un pelicula durante e temporada di vakantie den salanan VIP.

   Ademas di e Gift of Education, e aña aki Paseo Herencia tambe a aporta na e programa di “Adopt a youth for Gen297” organiza door di Asociacion Trabao di Hubentud na Aruba (ATHA) y asina aporta na e desaroyo di nos hobennan cu programanan educativo despues di scol.

   Paseo Herencia lo continua di sostene nos hobennan y ta desea tur mucha un bon aña escolar 2021/2022.