Articulo di siman - Pa hopi mucha, lesamento no ta algo facil. Tin algun mucha cu tin dificultad di crea e conexion entre e letter y nan zonido.
Otro muchanan no a haya un storia ainda cu ta interesa nan y mustra nan con dushi e por ta pa lesa. Pero pa tur mucha, reconoce letter, zonido, y palabranan ta un habilidad importante pa tin pa por sigui siña pa e resto di nan bida.
Purba e siguiente maneranan simpel pa haci bo yiu(nan) disfruta mas di lesamento:
Cuminsa cu e escogencia di bo yiu
Muchanan ta mas inclina pa lesa algo cu ta interesa nan. Por ehempel, comic books of buki di chiste por ta un bon escogencia pa bo yiu. Un comic book por yuda muchanan compronde cu storianan tin un comienso, e parti mei mei, y un fin. Nan tambe ta yuda forma vocabulario y mustra muchanan cu bukinan por ta algo leuk pa wak. Unabes bo yiu ta mas confortabel cu lesamento, bo por encurasha otro opcionnan cu tin un contenido mas dificil.
Lesa y lesa atrobe
Hopi mucha ta coi e mesun buki pa lesa bes tras di bes. Esaki no ta solamente okay, e ta algo bon! Ripiticion ta yuda muchanan siña e texto, y den tempo nan mes por les’e cu confiansa. Cada biaha cu ta lesa e mesun buki di nobo, e por yuda nan nota algo nobo y compronde e storia mas mihor. E experencia positivo aki por inspira muchanan pa purba di lesa bukinan nobo.
Lesa duro na boz halto
Ora bo lesa duro, e ta yuda bo yiu(nan) engrandece nan vocabulario y ta introduci ideanan nobo. Bo tambe por mustra nan cu bo ta disfruta di lesa y yuda nan conecta zonido na letternan cu ta riba e pagina. Ora bo lesa duro, e ta crea un oportunidad pa pasa tempo hunto cu bo yiu(nan) unda tur hende lo disfruta.
Crea oportundad pa lesa y skirbi fuera di lesa buki
Crea mas oportunidad pa lesa tur dia. Skirbi notanan pa bo yiu y laganan riba nan cusinchi, den nan tas di scol, of den nan saco di carson. Puntra amigo/anan y famia pa manda cartanan, emails, mensahenan via WhatsApp pa bo yiu pa e lesa. Busca letranan di magnet pa pone riba frishider y kisas por haya cu e muchanan mes lo cuminsa forma nan propio palabranan.
Hunga weganan di palabra
Ora ta den auto, bus of ta haci compras hunto cu e muchanan, por hunga diferente weganan di palabra pa traha riba nan habilidad di idioma. Por ehempel “I Spy” unda bo ta bisa “Mi ta wak cu mi wowo di spion, algo cu ta cuminsa cu un letter A”, anto mester bisa kico e ta. Otro weganan cu por hunga ta weganan unda ta scoge un categoria (manera: cuminda) y tur hende mester menciona un nomber di un cuminda cu ta cuminsa cu un cierto letter di alfabet. Muchanan tambe gusta lesa borchinan riba caminda (manera di restaurantnan, tiendanan, trafico, etc).
Conecta bukinan cu interes di e mucha
Ta importante pa crea conexion entre e storia di un buki cu e bida di bo yiu. Scoge bukinan basa riba nan interes. Por ehempel si bo yiu gusta “Paw Patrol”, e ora por busca buki di “Paw Patrol” pa lesa.
Fuente: https://kidshealth.org/en/parents/readers.html#catall-reading
Pa informacion of pregunta por acerca Fundacion Pa Nos Muchanan - Cumana 2
