Director di Cede Aruba Daniel Tecklenborg: - *Mester haci e mercado laboral mas atractivo
ORANJESTAD (AAN) – Director di Cede Aruba, Daniel Tecklenborg hunto cu señora Sheila van Veen, a reuni cu Formador Evelyn Wever-Croes, den cuadro di e reunionnan cu stakeholders, den e proceso di formacion di Gabinete Evelyn Wever-Croes.
Daniel Tecklenborg a duna su comentario den conferencia di prensa, despues di e reunion, tocante con e encuentro aki a bay,
Tecklenborg a expresa cu e reunion a bay den hopi bon ambiente, y cu e meta di Cede Aruba tabata pa reitera e propositonan di e instancia aki, nan logronan den e ultimo añanan, y tambe e retonan cu nan tin como organizacion y tambe como area social den e temponan dificil, na e momentonan aki.
Cede Aruba a reitera su meta principal, como un organizacion cu ta financia y sostene proyectonan den nos comunidad, mas tanto iniciativanan cu ta bin di nos pueblo mes, of organizacionnan cu no ta gobierno, mas tanto internacional, entre otro, Union Europeo, y tambe companianan local.
Tecklenborg a bisa cu Cede Aruba ta contento di menciona y mustra cu cada cuater aña, e financiamento di proyectonan a crece, tanto for di Cede Aruba mes, pero tambe door di e partnernan cu nan a logra atrae, specialmente durante e pandemia, cu iniciativanan manera “Happy to give back” pero tambe cu e fondonan di Union Europeo (E.U). El a agrega cu nan a ‘high lights’ algun resultado cu nan ta contento cune, pero nan a bay mas specifico riba e retonan cu ainda nan ta kere cu, claramente, door di e pandemia e pilar principal di Aruba a wordo sacudi hopi cu ta turismo.
Tecklenborg a expresa cu prome cu e pandemia ya caba tabata tin un des-balans entre e entrada di turismo y e posicion di e famianan na Aruba.
“E famia na Aruba ta bao di presion. Como famia bo ta responsable pa lanta bo yiu y tambe bo ta responsable pa cuida bo grandinan; y e mercado laboral y e sistema con Aruba ta traha, no ta duna bo e espacio, eigenlijk, pa bo funciona optimalmente como famia. Anto, hopi biaha e sector social tin cu carga e consecuencianan y tin cu soluciona e problemanan cu no ta cuminza cu nan, sino den e des-balans, anto nos a pidi specificamente pa pone na crea mas balansa; haci e mercado laboral mas atractivo pa hendenan local, pero tambe pa sostene e famia den esaki, pa e por cumpli cu su debernan, mirando e retonan cu nos tin cu nos hubentud, pero tambe cu nos adultonan mayor”, Daniel Tecklenborg a relata.
