Paseo Herencia ta amplia su programa di Gift of Education & Sports cu un edicion nobo: Gift of Arts

ORANJESTAD (AAN):  Pa mas di un decada, Paseo Herencia a compromete su mes pa yuda y

inspira hobennan talentoso di Aruba pa logra nan meta den deporte y educacion.

            E aña aki e famoso mall a dicidi di amplia su programa cu un edicion nobo, esta Gift of Arts, cu ta un iniciativa dedica pa apoya y stimula nos hobennan den arte y entretenimento.

            Diabierna Paseo Herencia a anuncia cu Gift of Arts ta un programa nobo pa 2025, cu ta sigui e mesun mision di e edicion di Sports. E ta pa duna sosten financiero na hobennan talentoso den arte creativo, incluyendo dansa, teatro, musica, arte visual y otro forma di expresionnan artistico. E programa lo ofrece un donacion pa yuda cubri gastonan relaciona cu nan desaroyo den e ramo artistico.

            E intencion ta pa ta trata di inverti den talentonan creativo local cu por representa Aruba den forma cultural y educativo.

            Pa mas cu 10 aña, Paseo Herencia a sostene e comunidad pa medio di su programa Gift of Education, cu ta yuda studiantenan cu ambicion academico, y den 2023, cu Gift of Sports, cu ta ofrece sosten pa atletanan cu nivel y meta internacional.

            E aña aki e Gift of Arts ta agrega un dimension nobo pa reconoce cu talento ta bin den hopi forma, no solamente den klas of riba veld, pero tambe riba e escenario y den studio di arte.

Modo di Aplicacion

Esnan cu ta desea aplica pa Gift of Arts mester:

• Entrega un carta di motivacion caminda ta splica nan meta y pasion den e mundo di arte.

• Manda un video creativo cu ta destaca nan talento, historia y logronan principal.
• Entrega un CV cu ta splica nan trayecto den arte.
• Inclui un carta di aceptacion di un programa of scol den e area di arte y entretenimento.

Tur documento mester wordo manda via email na This email address is being protected from spambots. You need JavaScript enabled to view it. antes di 31 di juli 2025. 

Un mensahe pa nos hobennan creativo

            Sea bo ta un studiante den danza, musica, arte visual of teatro, e Gift of Arts ta un oportunidad real pa avansa bo carera y wordo reconoci local y internacionalmente. “Hunto cu Gift of Education y Gift of Sports, nos ta spera pa sigui inspira un generacion nobo di lider, atleta y artista Arubano”, segun Paseo Herencia.