Tayer di ‘Media Literacy’ a pone enfoke riba impacto di media den bida diario

*A analisa con comunicacion digital ta influencia pensamiento y comportamento den e sociedad moderno

ORANJESTAD (AAN):   'News, Media and Information Literacy' tabata e nomber di e workshop cu Emerging Twenty Fifty a organisa cu sosten di UNESCO Aruba. Tabata dos dia di un workshop interesante caminda a elabora riba un tema cu ta hopi actual.

            Amber Sybesma a duna e workshop aki y el a splica cu esaki ta parti di un programa di participacion cu a keda entrega na UNESCO cu ta enfoca riba 'connecting lives y designing futures' y con por yuda comunidad pa ta mas resiliente pa e siguiente 25 - 50 añanan.

            El a duna di conoce cu e tin hopi pasion pa e tema aki  "ya cu e ta toca tur parti di nos bida. Nos tin asina hopi contacto cu hende diariamente via media. Aworaki hopi menos nos ta papia face to face cu hende y mas y mas nos ta manda email, nos ta manda WhatsApp, nos ta yama. Bo ta riba bo rednan social y esey ta afecta tambe con nos ta actua como hende".

            Sybesma a laga sa cu e meta di e tayer ta pa 'slow down' un tiki y wak con ta interactua cu media y con ta anda cu tur e mensahenan cu ta drenta tur dia cerca nos, el a expresa.

            Banda di esaki mester percura pa hende keda saludabel y no pusha nan limitenan mas leu ora di haci uzo di e rednan social, por ehempel.

            El a enfatisa cu den 'media literacy' no ta djis reacciona na publicacionnan. 'Awendia nos tur ta post riba nos social media, nos ta manda email, manda WhatsApp, manda tur e mensahenan y con nos por pensa dos biaha con nos por crea mensahenan cu ta, no necesariamente positivo, pero sostenibel den e positivismo di e mensahe. Con nos por percura pa e meta di e mensahe por yega y cu por traha hunto riba nos causanan".

            Durante e workshop e participantenan por a enfoca riba kico nan metanan ta y unda por influencia y uza nan bos a traves di media pa haci un cambio den nan comunidadnan, Amber Sybesma a indica.

            El a remarca cu tur hende na mundo ta beneficia di keda practica 'media literacy'. E ta un 'skill' cu tin cu keda uz'e y practic'e manera un deporte. Si bo stop y bo slow down, of bo stop di hacie bo no ta reconoce e señalnan mesun lihe. Door di keda practica 'media literacy' bo ta keda 'sharp'.

            Den e contexto ey ta hopi bon pa tur hende ta parti di dje pasobra tur hende tin otro experiencia di nan media y ki hermentnan por haya pa nan reenforsa pa sinti cu tin control di media y no cu media ta controla nan, el a agrega.

            Anne Marie Carrillo, kende ta traha como Communications Associate na Aruba Airport a participa den e workshop y el a expresa cu el a haya e workshop hopi informativo. "Awendia nos ta biba den un era cu tur cos ta move asina lihe y esaki por a yuda nos analisa for di unda nos ta haya tur e informacion cu nos ta consumiendo tur dia y si e fuente ta confiabel. Mi ta hopi contento cu mi lo por aplica loke nos a siña den mi trabao y den mi bida diario.

            Faridi Abdul Hamid, kende ta un 'journal coach' a manifesta cu e tayer a hacie mas consciente di kico e ta publica riba su Facebook Page of con su comportacion ta den Facebook. "E ta pone mi pensa tambe riba e tipo di mensahe cu mi tin cu skirbi pa e hendenan cu ta sigui mi", el a bisa.

            Edeline Berg, Communications and Marketing Manager na Aruba Conservation Foundation a indica cu como un comunicador profesional y tambe como un persona cu den bida diario ta comunica e ta haya e tipo di tayernan aki importante pa asina analisa e influencia ariba e diferente comunidadnan cu e ta aden. "E ta un recordatorio pa nos, cu nos tin un responsabilidad etico pa comunica e informacion cu ta corecto pasobra e por tin un influencia riba hende", Edeline a finalisa bisando. 

Kico ta 'Media Literacy'?: E habilidad pa por haya acceso, analisa, evalua, crea y actua uzando tur tipo di comunicacion. Alfabetisacion di media ta yuda hende relaciona cu e mensahe den media di un manera critico, reconoce parcialidad, prehuicio y desinformacion, compronde e rol di media den sociedad y expresa nan mes den diferente forma a traves di medionan social.